Hadien ki Nonghikai, yn mih ïakhih sa ki nongtrei ka koit ka khiah

0

Shillong, Naitung 04: Hadien ka jingïakhih ki Nonghikai, mynta yn mih ïakhih sa ki Nongtrei jong ka koit ka khiah ba la tip kum kita ki Service Delivery Staff kiba hap hapoh ka jingpeit jingkhmih jong ka National Health Mission.
Ha ka jingshisha kine ki nongtrei ki la sangeh treikam naduh mynta ka sngi bad lashai ka sngi pat kin pynlong ïa ka jingïaid paidbah (rally) naduh Madan Malki sha ophis treikam jong ka Directorate of Health Services (DHS) ha Laitumkhrah.
Kine ki nongtrei ki la pynpaw ka jingbymhun halor ka final draft jong ka pynshongnia ïa ka jingtreikam bad ka jingsiew jong ki ba la pynkhreh da ka ophis jong u Mission Director ka NHM, Meghalaya, ba la pyndep ha ka 30 tarik jong u bnai baladep.
“Kane ka final draft kam shym la long katkum ka jingkwah ne ka jingai jingmut jong ngi”, la ong ki nongtrei, kiba la ïathuh ba kine ki nongtrei ki don kumba ar hajar ngut ha Meghalaya.
Nangta ki la pynpaw ruh ïa ka jingbymhun halor ka jingkhate noh ïa ka tulop jong ki katto katne ki nongtrei ha kane ka final draft bad ym shym la pynbeit satia naduh ka draft kaba nyngkong haduh kaba lai ruh.
Kane ka jingkhate tulop na ki katto katne ki nongtrei ka la buh ïa ki nongtrei ha ka jingdukha mynsiem bad ka jingbynñiaw kaba khraw, khamtam ha kine ki sngi ba ka dor jong ki marbam marduh ka la kiew bha.
Kumta na ka liang ki nongtrei kila dawa ba ka ophis u MD ka NHM kam dei satia ban khate ïa ka tulop jong ki nongtrei bad ba u MD udei ban pynbeit biang ïa ka draft kaba khatduh eh kaba ïadei bad ka jingpynshongnia ïa ka jingtrei bad ka jingsiew jong ki.
Hynrei shi sngi shuwa ka jingïakhih, ki nongtrei ka NHM ki la ïoh pdiang ïa ka shithi ba kidei ban leit trei beit ha kaba la bthah ïa ki DHMP ban shim atendance naduh ka 4 tarik mynta u bnai, namar ba ka jingshakri jong ki kadei halor ka koiyt ka khiah.

Leave A Reply

Your email address will not be published.