Jowai, Naiwieng 19: Ka Sutnga SSCC kala bat ïaka kyrdan ba ha khlieh duh jong ka lympung ïalehkai Super Division Football Tournament-2025 ba pynïaid da ka East Jaiñtia Hills District Football Association da kaba kamai 18 points na ki 7 tylli ki jingïalehkai hadien ka Round-7.
Haba phai sha ka jingïakhun ba nyngkong hynne ka sngi Balang, 19 tarik, ha madan Artificial Turf, Diengshynrum, Khliehriat, na ka liang ka kynhun ïalehkai jong ka Diengshynrum SC kala jop da 1-0 kol ïaka Thangskai Tiger SC, ïa katei ka shikol la thep da u Rumi Lyngdoh haka minit ba 60.
Katba haka jingïakhun kaba ar ka Sutnga SSCC kala jop da 1-0 kol ïaka R.Shkenshynriah SC, ïa katei ka shikol na ka Sutnga SC la thep da u Sauni Phawa haka minit 85.
Haba phai sha ka jingïoh points ka kynhun Diengshynrum SC lyngba ka jingjop jong ka mynta ka sngi kala kiew noh sha ka kyrdan ba ar da kaba kamai 14 points na ki 7 tylli ki jingïalehkai, ka Shilliang Umshong SC ka wan ha ka kyrdan ba lai hadien ba ka kamai 13 points na ki 7 tylli ki jingïalehkai. Ka R.Shkenshynriah SC ka wan haka kyrdan ba saw da kaba kamai 12 points na ki 7 tylli ki jingïalehkai.
