Shillong, Naiwieng 21: Hadien ka jingpynkut ïa ka Ranji Trophy 2025-26, ka kynhun ïalehkai kriket ki shynrang jong ka Meghalaya shen kan sa wanphai biang sha ka jingïakhun ha ka lympung ‘Syed Mushtaq Ali Trophy 2025-26’, kaba long ka jingkylla na ka lympung kriket kaba saw sngi sha ka lympung kriket T20.
Ha ka sngi Thohdieng (21 tarik Naiwieng) ka Meghalaya Cricket Association ka la pynbna ïa ka kynhun ïalehkai na ka bynta kane ka lympung – ha kaba ki jingïalehkai plate group kin sdang naduh ka 26 tarik u Naiwieng haduh ka 06 tarik u Nohprah bad yn pynlong ha ki jaka bapher bapher ha Pune.
Ka Meghalaya kan pynïalehkai ïa ka kynhun kaba don tang ki rangïalehkai trai jylla, khlem da kynthup lang ïa ki nongïalehkai ba nabar (guest player). Ka jingjied ïa ka kynhun ka long ar sien – ha kaba la bishar bñiah ïa ki nongïalehkai kiba ïoh mih madan ha ka Ranji Trophy katkum ka jingtbit jong ki, katba kito ki bym shym la don ha ka kynhun ba nyngkong (first-class) ki la shim bynta ha ka jingpynkhreh ha Jagiroad, Assam.
Ka jingïalehkai ba nyngkong jong ka Meghalaya kan long pyrshah ïa ka Sikkim ha ka 26 tarik Naiwieng. Kiwei pat ki kynhun kiba hap lang ha kajuh ka plate group ki long ka; Arunachal Pradesh, Mizoram, Manipur bad ka Nagaland.
Ka kynhun kan mih ban leit sha Pune ha ka 23 tarik u Naiwieng. Ki nongïalehkai kiba don mynta ha Jagiroad na ka bynta ka prokram pynkhreh ki dei ban leit beit beit sha Guwahati Airport ha katei ka sngi. Ki nongïalehkai bad ki support staff na Khasi-Jaiñtia Hills kin wanmih ha madan Polo ha Shillong ha ka 23 tarik Naiwieng shuwa ba kin leit sha Guwahati Airport.
Ka thup kyrteng ki rangïalehkai ka Meghalaya ki long: Kishan Lyngdoh, Arpit Bhatewara, Akash Choudhary (C), Abhishek Gupta, Kush Agarwal, Lerry G Sangma (VC), Aaron Nongrum, Rohit Shah, Sengsrang K Sangma, Swastic Chettri, Badonnam J Mylliemngap, Ram Gurung, Swarajeet Das, Himan C Phukan, Agreas Chamcham Sangma
Standby: Dippu Sangma, Jaskirat Singh Sachdeva, Anish Charak, Riboklang Hynniewta, Arien Bonchang Sangma
Support staff: Moisten Ch Marak (head coach), Pyntngen Mark A Swer (assistant coach), Surojit Biswas (physio), Vikash Singh Chauhan (trainer), Banteibor Lyngdoh (manager).
