Nongpoh, Jymmang 09: Hadien ka kynrum kynram kaba la mih haka shnong Umsaw Nongkharai ha Ri-Bhoi naka kam Rangbah Shnong kaba naduh ba la jied Rangbah Shnong ym pat shym la thaw ruh ïaka Executive Committee jong ka shnong, hynrei ka long ka jingkmen ïaki paidbah hadien ba ha ka 07 tarik Jymmang katei ka jingïapher jingmut kala kut noh bad poi sha ka jingsngewthuh jingmut hadien bala lah pat ban thaw thymmai bad ban jied ïaki nongkitkam nalor u Rangbah Shnong. Kum ban shu pynpaw ba katei ka shnong kala pynlong ruh ka jingjied Rangbah Shnong thymmai haka 22 tarik Kylla Lyngkot 2022 ha kaba u Bah Angelus Sun u la shah jied biang kum u Rangbah Shnong hadien ba u la pynliem ïa u Samla Tony Shylla da 5 vote ,hynrei hadien ka jingjop ym shym la don kano kano ka jing thaw EC ha kaba la pynlong ia ki paidbah nongshongshnong ban ia mih paidbah haka 23/03/2022 ban pyrshah halor ka jing sngap jar ia ka jingthaw ec hapoh shnong, kaba u paidbah babun balang u la ap khmih lynti.
Kumta na ka liang u Bah Angelus Sun Rangbah Shnong u la khot da ka meeting haka 4/5/2022 ban ïa pynbeit ïa ki kam jied nongkitkam hapoh ka shnong hynrei kam shym la poi shano shano ruh bad ha kane ka sngi la pulom noh kumta la buh biang haka 7/05/2022 ïa ka meeting ban thaw ia ka EC jong ka shnong kaba sngew kmen ka long ba ha kane ka sngi la ioh ban pyniaid beit iaid ryntih khlem kano kano ka huri hura lait noh tang ki jing ia ñia kiba malu mala, bad na ka liang ki paidbah da ka jing ia sngewthuh jingmut lang la ioh ban thaw ia ka EC ba thymmai ha kaba u Tony Shylla u la long kum u Secretary jong ka shnong bad 10 ngut ki wei pat ki dkhot kynthup ia u Rangbah shnong.
Kum kadak ka jing ïa sngewthuh jingmut ha kane ka sngi la ïa khublei kti mar kylliang na baroh ar liang mamla ki paidbah nongshnong bad la kular ruh bad ïa treilang na bynta ki kam shnong la ha ka iap ka im ha ka shitom ka shipa bad ha kiwei kiwei ki bynta kaba long ruh ka sngi sah jingkynmaw ïa kane ka shnong kaba la mad ïaka kynrum kynram la bun snem bad ktah ruh ïaka roi ka par jong ka shnong.
