Hadien ka jingsospon u Syiem, plie u Acting Syiem ka Hima Langrin ïa ka Dorbar ba nyngkong ha Phlangdiloiñ
![](https://mawphor.com/wp-content/uploads/2023/08/langrin-Copy.jpg)
Mawkyrwat, ‘Nailar 23: U Acting Stiem jong ka Hima Langrin Syiemship, u bah Bryllyenhenry Syiemïong, mynta ka sngi ka 23 tarik u ‘Nailar, 2023 u la ïoh ban lum bad plie ïa ka Dorbar Hima ba nyngkong ba la pynlong ha Shnong Phlangdiloin, South West Khasi Hills District.
Kane ka jingplie biang ïa ka Dorbar Hima ba thymmai jong ka Hima Langrin Syiemship ka dei hadien ka jingshah pynsangeh shipor ne suspend ïa ka jingtreikam jong u Pa’iem Nangtei Sing Syiem kum u syiem jong ka Hima Langrin katkum ka bor ba la pynkhamti da ka Section kaba 7 jong ka Khasi Hills Autonomous District (Nomination and Election of the Syiem, Deputy Syiem and Headman of Langrin Syiemship) Act, 2007 lyngba u Joint Secretary sha ka Executive Committee, Khasi Hills Autonomous District Council (KHADC), Shillong.
U Acting Syiem, u bah Bryllyenhenry Syiemïong ula ïoh ruh ban pule ïa ka jingpynbna ïar ha ka Hima Langrin haroh kawei na ka daw ba ka Executive Committee, Khasi Hills Autonomous District Council ka la pynsangeh shipor ïa ka jingtreikam jong u Nongtei Sing Syiemiong kum u Syiem jong ka Hima Langrin katkum ka bor ba la pynkhamti da ka Section 7 jong ka “The Khasi Hills Autonomous District (Nomination and Election of the Syiem, Deputy Syiem and Headmen of Langrin Syiemship) Act, 2007”. Kumba la pynbna haduh mynta ha ka jingpynbna kaba 18 tarik u ‘Nailar, 2023, ban thung ïa u Bryllyenhenry Syiemiong kum u Acting Syiem jong ka Hima Langrin u ban pynïaid shipor ïa ka Synshar Khadar hapoh ka Hima.
Shuh shuh ula ïoh ruh ban pynsngew halor ka shithi kaba la wan na u Deputy Chief Executive Member, In-charge Elaka Administration, Khasi Hills Autonomous District Council sha u bah Byllyenhenry Syiemiong, Langrin Syiemship ba ka Executive Committee jong ka Khasi Hills Autonomous District Council ka la pynsangeh (Suspend) ïa ka jingtreikam u Nongtei Sing Syiemiong na ka kam jong ka Hima Langrin bad katkum ba la pynkup bor da ka Section 9 jong ka aiñ, “The Khasi Hills Autonomous District (Nomination and Election of the Syiem, Deputy Syiem and Headmen of Langrin Syiemship) Act, 2007” ka la thung ïa u Byllyenhenry Syiemiong kum u Acting Syiem Hima Langrin ban pynïaid shipor ïa ka synshar khaddar ha ka Hima, ryngkat ki kyndon kata ba un pynïaid ïa ka synshar khadar ha ka Hima ryngkat bad ka jingïatreilang bad ka Executive Dorbar ka ban kynthup ïa ki Myntri, Lyngdoh bad ki tymmen ki san kiba yn jied da ka Dorbar Hima, ïa kaba un khot kyrkieh na ka bynta kane bad ba un phah ïa ki kyrteng jong ki dkhot ba la jied da ka Dorbar, sha kane ka Executive Committee, Khasi Hills Autonomous District Council ba kan mynjur.
Kawei pat ka long ba un pynïaid ïa ka synshar khaddar katkum ki riti dustur ba ju don ha ka Hima bad ki aiñ ki kanun kiba ka District Council ka la lah pynjari ne kiba yn dang pynjari bad ban kohnguh ïa ki hukum bad jingbthah baroh kiba ka Executive Committee ka pynmih na ka por sha ka por ne na kino kino ki ophisar kiba la aibor na ka bynta kata bad un wad barabor ïa ka jingbthah jong ki ha baroh ki kam kiba un shem jingeh ha ka jingïadei bad ka synshar khaddar ha ka Hima.
Hadien ka jingjied ïa ki katto katne ngut ki ‘riew rangbah ki ban sa mihkhmat sha ka EC, Khasi Hills Autonomous District Council, u bah Byllyenhenry Syiemiong u la kyntu ka bynta jong ki ba haba kwah ba ki kam kin long kiba ïaid beit ïaid ryntih kawei ka mat ka long ba ki dei ban don ka jingïatreilang, ïa sngewthuh jingmut ha ki bynta baroh khnang ba ki kam hapoh ka hima kin long kiba ïaid beit ïaid ryntih.
Ym tang kata ha kane ka jingïalang, u Acting Syiem ryngkat ki nongwan sha ka Dorbar ki la ïoh ruh ban shim ïa ki katto katne ki rai ban pyntreikam bad pynduh nangne shakhmat kata ka long ban pynduh ïa ka jingpynmih jong u Syiem Nangtei Sing Syiem ha u snem 2015 u la pynmih ba kiba wan sha ka Dorbar Pyllun jong ka Hima ki dei sa tang ki Myntri, ki Lyngdoh, ki Sordar Shnong, ki Secretary Shnong bad ki Deputy Syiem hynrei ki paidbah pat kim lah shuh ban wan, kawei pat ban wan ïa ka pisa kaba la jah haduh 15 klur duna, ban wad ïa ki kot ki sla jong ka hima ne ka Dulir jong ka hima bad kiwei de.
Namarkata, ïa kine baroh ki rai la rai paidbah mynta ka sngi ka 23 tarik u ‘Nailar, 2023 ban pyntreikam bad ban leh ïa kaba donkam na ka bynta ka jingbha lang jong u paidbah ka Hima Langrin Syiemship baroh kawei.
Kham ha swha, la pule ruh ïa ka jingpynbna ïar na ka Khasi Hills Autonomous District Council (KHADC) da u samla Wanladkyrpang Lyngdoh Langrin bad bud da ka jingkren lyngkot na u bah Leventon K. Lyngdoh bad jingkren jingpynshai ïa ka shithi kaba wan na ka High Court na u bah Baldwis Syiemiong bad ka jingkren khublei na u bah Andraias Lyngdoh.
Ïa ka jingïalang la pynïaid da u bah Bryllyen-henry Syiemiong, Acting Syiem bad la pule ïa ka Sanad ba la ai da ka KHADC da u Dy. CEM uba peit ia ka Elaka u Bah Pynshngaiñ N. Syiem.