Shillong, Nailar 01: Ha kawei na ki jingjia ïashoh ïadat hapdeng ki ar kynhun ki khynnah samla kaba la jia ha ka 28 tarik u Naitung hapoh ka jaka pynïeng kali jong ka Kad Liengsuiñ ka Shillong Umroi Airport, uwei u samla u la dkhat noh ïa la ka jong ka jingim ha u tyllai phasi hadien ba la dep kut kane ka jingjia ïashoh ïadat.
Katkum ka tyllong khubor ba la ïoh la ïathuh ba kitei ki ar kynhun kidei kawei na ka shnong Ïew Umroi bad na ka shnong Umeit bad katkum ka khubor ba la ïathuh da u u Superintendent of Police ka Ri Bhoi District u Jagpal Singh Dhanoa u la ïathuh ba na ka liang ki pulit ka Khapmara PIC ki la leit mar mar sha kane ka jaka kaba la don ka jingjia ïashoh ïadat hapdeng kine ki ar kynhun ki samla, hynrei kim shym la lap shuh ïa kane ka jingjia.
Hynrei kham hadien jong kane ka jingjia, uwei u samla uba la tip kyrteng da u Khrawboklang Sten ba la 28 snem ka rta uba na ka shnong Umroi Nongrah, uba la don bynta ha kane ka jingïashoh ïadat, u la pynkutnoh ïa la ka jong ka jingim da kaba sdien phasi hapoh ka kamra jong u.
Halor kane ka jingjia ka khubor ka ïathuh ba ha ka step phyrngap jong ka 29 tarik u Naitung 2024, ïa ka met jong utei u samla la lap hi da ka kmie jong u, ka kong Dygracia Sten ha ka por 4.30 mynstep bad la ïathuh ba hadien jong ka jingwan poi ki pulit ïa ka met jong une u samla la lah dep ban pynhiar noh da ki bahaïing hasem bad na ka jingtohkit ki pulit la ïathuh ba kim shym la lap satia ïa ki dak mong na ka met jong une u samla, hynrei la lap tang na ki dak mong jong u tyllai phasi na ryndang.
Hadien jong kane ka jingjia na ka liang ki pulit ki la pynpaw sha ki bahaïing ïa ka jingdonkam ban leh ïa ka postmortem hynrei na ka liang ki bahaïing namarba ki pynpaw ba kim don ïa kani kano ka jingsuba sniew, kumta ki la kyrpad ïa ki bor pulit ban pynlait noh na katei ka jingleh ïa ka postmortem ha kaba na ka liang u Magistrate u la pdiang ruh ïa kane ka jingkyrpad ki bahaïing.
