Shillong, Naitung 13: Ki seng saiñ pyrthei kiba la ïatreilang hapoh ka sorkar Meghalaya Democratic Alliance (MDA) 2.0, kiba kynthup ïa ki paralok ka National People’s Party (NPP), kum ka Bharatiya Janata Party (BJP) bad ka Hill State People’s Democratic Party (HSPDP) ki la pynkhreh ïa ka jinglah ban don ka jingpynkylla ïa ki bhah shuki myntri ha kine ki bnai ban sa wan.
Ki tyllong khubor ki ïathuh ba ka jinglah ban jia ka jingpynkylla ïa ka bhah shuki myntri hapoh ka sorkar MDA ka lah ban wanjia ha u bnai Nailur hadien jong ka Ïingdorbar Synrai jong ka Meghalaya Legislative Assembly.
Ki seng saiñ pyrthei kum ka BJP bad ka HSPDP kiba don mar arngut ki MLA ki lah ban khmih lynti ïa ka jingbhah lang ha ka kam long myntri bad kiwei pat ki seng saiñ pyrthei.
Kumba ka long mynta, na ka liang ka BJP, u Bah Alexander Laloo Hek u dei u Myntri kane ka sorkar MDA, ïa u lah ruh ban pynbujli noh da u MLA ka South Shillong u Bah Sanbor Shullai.
Kajuh ruh ka jingïapynbeit kaba ïasynriem la dep ban leh ha ka sorkar MDA 1.0 kaba la leit noh ha kaba u Bah Hek u la long myntri kumba 2 snem shiteng bad u Bah Shullai pat u la long u Myntri haduh bakut ka samoi treikam jong ka sorkar MDA 1.0.
Na ka bynta ka seng HSPDP, u Bah Shakliar Warjri, uba bat ïa ka tnat Sports and Youth Affairs u lah ban shah bujli noh bad ban ailad pat ïa u Bah Methodius Dkhar uba dei u paralok hapoh ka sorkar MDA bad uba dei ruh na ka HSPDP.
Ha kajuh ka por, ki tyllong khubor ki ïathuh ruh ba ki paralok kiba kongsan bha hapoh ka sorkar synrop ka MDA, na ka liang ka NPP ka la dang khroh ïa ki katto katne ki myntri sorkar kiba mynta napoh kane hi ka seng ba kin ai lad lang ïa kiwei pat ki MLA ka seng ban ïoh lang ka bhah shuki Myntri.
Ki tyllong khubor ki ïathuh ruh ba uwei un lah ban dei napoh ka thaiñ Jaintia Hills bad uwei pat u lah ban dei napoh ka thaiñ Garo Hills.
