Nongpoh, Nailar 13: Ka Nongpoh Town Shopping Complex kaba la ju tip paidbah ruh kum ka MUDA Complex kaba dei kawei naki iew kaba bun naki dukan ki shu khang khyrdep mynta la bun snem naduh bala plie paidbah ïaka namar ka jingbym shimkhia da ki briew kiba shim wai, namar kiba bun ki dukan kila shu khang tala man ka sngi, hynrei mynta ka sngi kala phuh kynsan hadien ba ki dukan baroh kila plie bad ishongshit naka jingwan rung ki paidbah hadien ka jingsdang jong ka iew pyni nam kaba 4 sngi lynter ne ka Nongpoh Shopping Carnival hapoh katei ka Complex.
Ïa katei ka Nongpoh Shopping Carnival la wan ban plie paidbah mynta ka sngi da u Abhilash Baranwal Deputy Commissioner ka Ri-Bhoi District kum u kongsan, haka jingdonlang ka kong B Rani ADC Ri-Bhoi, Bah Eric Kevin Dkhar BDO ka Umling C&RD Block, ki ophisar naka tnad Urban bad kiwei kiwei.
Ïa katei ka Iew la pynlong da ka Nongpoh Town Shopping Complex haka jingsnohktilang abd ka G&C Store bad kane ka iew kan neh tang kumba 4 sngi lynter bad pynkut pat haka sngi Saitjaiñ.
Naka liang u Deputy Commissioner ka Ri-Bhoi District haba kren ha katei ka sngi u la ong ba ka daw ba la pynlong ïa katei ka iew ka long kum ka jingpynphuh pynphieng bad ai mynsiem ïaki nongshong dukan ha katei ka Complex namar bun naki dukan ki ju khang tala man ka sngi bad lyngba katei ka iew pyni nam ka long ka jingai mynsiem ïaki nongshong dukan ba ki dei ban plie man ka sngi bad kumjuh ruh ban khring ïaki paidbah ban rung ha katei ka Complex.
