Hadien ba wan jngoh u nongïalam Sorkar leit jngoh sa u nongialam Lïang Pyrshah ïa ka SGH
Sam marbam u Zenith sha ki 900 tylli ki longïng
Shillong, Jylliew 24 : Hadien shisngi ba u Nongïalam Sorkar u Conrad K Sangma u la wan jngoh ïa ka South Garo Hills khamtam ïa ka Siju Karukol bad Rongdong mynta ka sngi sa u Nongïalam ka Liang Pyrshah u Dr Mukul Sangma ula leit jngoh ïa ka South Garo Hills na Rongara sha Siju.
Ha kane ka jingleit jngoh bad ïa kynduh ïa ki shem lanot shlei um u Dr Mukul u la ai jingïarap ruh ïa ki da ki marbam mar dih.
Ka South Garo Hills ka dei kawei na ki District kaba shah pynjulor jur ha ka jingshlei um namar ka jingkiew palat ka wah Simsang. Kiba bun ki jingkieng ki la shah rong lut bad bun ki surok ruh ki la shah pynjulor. Nalor ba ka South Garo Hills ka dei kawei na ki district ba dang sahdien tam, kane ka jingshah lyngshop ha ki bor mariang ka la nang pynsahdien shuh shuh ïa katei ka District.
Ki la don bun ki jingtwa naduh Maheskola shaduh Siju. Ki surok ki sahkut lut da kine ki jingtwa khyndew bad ki maw ki baheh baheh.
Ki don kumba hynriew tylli ki jingkieng kiba la shah rong ha ka umsaw bad bun tylli ruh ki dieng pynïeng bording ilektrik ki la khyllem bad kane kala buh ïa katei ka district ha ka jingdum. Nalor kane wat ka leit ka wan ruh ym lait shuh ban ïaid da ki kali.
Na ka liang ka AITC ka pynpaw ba kane ka jingleit jngoh bad ïa kynduh ïa ki lanot shlei um da u nongïalam ka party ha Meghalaya ka pynpaw ba ka AITC kam ieh khunswet ïa ki shem lanot hynrei ka ïadon ryngkat bad ki ban ai jingkyrshan ïaki namar kumba ka la rai ban ïadon ryngkat bad ki paidbah kumta ruh kan ïadon ha ka por jong ka jingeh bad jingsngewbha ruh.
Kumjuh ruh na ka liang u para pat jong u Nongïalam ka Liang Pyrshah uba dei u MLA jongka Rangsakona u Zenith Sangma u la leit ban ai jingïarap ïa ki paid ka Constituency jongu kiba la mad ia ka jingeh na kane ka jingshlei um. Ula ai jingïarap ïa ki da u khaw bad u dai, shini, umphniang bad ter ter.
Ki don haduh 900 tylli ki longïing na ki 11 tylli ki shnong kiba hap hapoh ka Ranasakona Constituency kiba shah ktah jur na kane ka jingshlei um bad sha kine u la sam da u khaw bad u dai. Haduh mynta ki jingtwa ki dang ïai jia beit ha ri lum Garo wat la u slap u la duna ruh. Tangba ym shym la don kiba iap kat haduh ba thoh ïa kane ka khubor.