Hadien ba theh 2000 klur, ap ka Meghalaya sa kawei ka projek surok ba heh na Japan

Shillong, Jymmang 30 : Ka Japan hadien ba ka la dep ban kyrshan ïa ka Meghalaya na ka bynta ban pynheh ïa ka surok na Shillong sha Dawki mynta pat ka la ïatehlok bad ka skulbah NEHU na ka bynta ban hikai ïa ka ktien Japan na bynta ki nongshong shnong ka thaiñ shatei lam-mihngi jong ka Ri.
Kane ka jingthmu jong ka Japan ka la paw pyrthei ha kane ka sngi Nyngkong hadien ba u Chief-de-Mission jong ka sorkar Japan, u Kawazu Kunihiko u la wan ban kynduh ïa u Symbud Myntri Rangbah ka jylla, Bah Prestone Tynsong ban pyntip halor katei ka sienjam ba ki shim.
Haba kren bad ki lad pathai khubor hadien kane, u Bah Prestone u la ïathuh ba ha katei ka jingkynduh ki la ïoh ban ïa kren ïa bun bha ki phang kiba ïadei na ka bynta ban wanrah shuh shuh ka jingïatreilang bad ka jingïajan bad ka ri Japan.
“Na ka liang ka sorkar Meghalaya ngi pynpaw ka jingsngewnguh ïa ka sorkar Japan kaba la kyrshan ïa ka sorkar Meghalaya haduh kumba 2000 klur tyngka ha kyrteng jong ka JICA na ka bynta ban shna ïa ka surok Shillong – Dawki bad kawei pat ïa ka surok 127B kaban pynïasoh ïa ka Shillong-Nongstoiñ sha Tura,” la ïathuh u Bah Prestone.
Nalorkata, u la ïathuh ruh ba kitei ki heh na Japan ki la pyntip ruh ba ki la wan ban kynduh ïa ki bor pynïaid jongka skulbah NEHU na ka bynta ban pynrung noh ïa ka ktien Japan naduh kane ka samoi.
“Kane ka sienjam ba shim da ka sorkar Japan bad ka NEHU kadei kaba la ïoh jingbit ruh na ka tnad Pule Puthi jong ka sorkar India,” la bynrap shuh shuh u Symbud Myntri Rangbah.
U Symbud Myntri Rangbah u la ïathuh ruh ba mynta na ka liang ka sorkar ka la tyrwa sa kawei ka projek surok sha ka sorkar Japan tangba haduh mynta kim pat ïoh satia ïa ka jubab.
Katei ka surok kaba ki tyrwa kadei ka surok Shillong – Mawngap Mawphlang – Mawsynram sha Lad Ranikor kaban pynïasoh pat bad ka surok ba shna da ka NHIDCL.
La ïathuh ba ki la ïakren ruh halor kumno ban weng ïa ka dheng kali bad ruh ban pan jingmut na ka sorkar Japan ban wanrah ïa ki buit treikam kiba lah ban pyrthuh lang ha kane ka jylla ruh.