Hadien ba la thung kam bun ngut ki trai shnong la shah biang ban plie ïa ka karkhana nar ha Rwiang

Nongstoiñ, K’lyngkot, 27 : Dei ha ka 27 mynta u bnai ba u sordar jong ka shnong Rwiang, West Khasi hills u la khot ïa ka dorbar shnong na ka bynta ban ïakren halor ki bun ki kam kiba ïadei bad ka bha ka miat jong ka synshar khadar hapoh ka shnong Rwiang.
Ha kane ka sngi kawei na ki mat kaba kham kongsan ba ka dorbar kala ïakren bad phylliew jingmut ka dei halor jong ka jingailad biang jong ki paidbah ryngkat bad ka dorbar shnong ïa ka Shree Shakambari Ferro Alloys Private Limited ba kan plie bad treikam biang.
U sordar jong katei ka shnong haba ïakren bad u nongthohkhubor hadien ba la wai ka dorbar u la pynkynmaw ba ha u snem ba ladep ki paidbah ka shnong Rwiang kila pynlong da ka jingïakhih kaba jur halor ka jingbym burom shuh jong ki nongpynïaid jong katei ka karkhana ïa ki kyndon treikam bad ka soskular ba la ïateh bad mynjurlang bad ka dorbar shnong ha kaba ki paidbah shnong ha ryngkat ka jingïatreilang bad ki nongïalam jong ka All Meghalaya Truck Owners & Driver Asdicitiation ba la ïalam da u bah Moslandar Marngar kila khang khyrdep syndon ïakatei ka karkhana.
Bad dei ha kane ka dorbar ba la rai ban ailad biang ïakane ka karkhana ban plie bad treikam biang hadien ba ki bor pynïaid jong kane ka karkhana kila pynrung bad thung kam kham bun napoh kane ka shnong. Bad kumjuh ruh na ka nongpynïaid jong katei ka karkhana ki la mynjur ba kin pynurlong noh ïa ki jngkular bad ki kyndon ba ki ladep ïasoi bad ka dorbar shnong.
Na ka liang u sordar ryngkat ki paidbah jong ka shnong Rwiang kila ai khublei kyrpang ïa u bah Moslandar Marngar bad ïa ka Association kiba la shimkhia bad ïadonbyntalang bad ki paidbah jong ka shnong naduh ba sdang ka jingïakhih haduh ban da ïoh ïa ka jingjop.