Mairang, Nailur 27: Ka kynhun ïalehkai ki Pastor jong ka KJP Synod Sepngi kaba dei na Mairang Zone, ka la jop pyrshah ïa ka kynhun ïalehkai phutbol ki ophisar sorkar lyngba ka tie breaker ha ka jingïakhun kaba la long ha sngi nyngkong ha madan Dommalum, Pyndemumïong, Mairang,
Kane kadei ka jingïalehkai kaba la pynbeit da ka Jingïaseng ïatei ïasyllok ki Pastor jong ka KJP Synod Sepngi kum ka jingpyrshang ban pynmih pisa na ka bynta ka Dr. H. Gordon Robert Hospital, Shillong ha ka jingrakhe dap 100 snem jong ka.
Kane ka jingïakhun ha Mairang kadei ka sien kaba saw ba ki Pastor bad ki Ophisar sorkar, hadien ka jingïakhun nyngkong ha Nongstoiñ, Mawkyrwat bad Umroi. Ha kine ki jingïakhun baroh lai tylli ki Pastor ki la shah rem bad dei ha Mairang ba ki la ïoh mad ïa ka jingjop ha ka jingïakhun kaba itynnad bad ïabiang bor.
Ha ka jingïakhun ha Mairang, wat hapdeng ka jingpynthut u slap ha shuwa ban sdang ka jingïalehkai, hynrei kam shym la khanglad pat ïa ki paidbah ban ïatuid bad pyndap ïa kane ka mdan kaba ju khring bha ïa ki paidbah ieit phutbol.
Ha ka jingïakhun, ka team ki ophisar ka la ïoh pynkhih jar nyngkong lyngba ka free kivk kaba jngai kumba 40 yard na goal lyngba u Dr. CL Nongbri bad ka jingrung ka bol sha goal kadei ka jingbymbiang u nongap kol ki Pastor, u Rev. Shanlang Marngar jong ka Mairang Presbytery.
Ha kane ka jingïalehkai la ïohi ba kiba bun ki paidbah ki kham ïashah ïa ka team jong ki Pastor bad ki la ïahylla bad ai mynsiem ïa ki Pastor. Kumta ha ka kylla miet, ki Pastor ki la ïoh ban pynïakhaid lyngba ka kol kaba itynnad bha hadien ka jingïaknieh kaba jur bha habar jong ka penalty box bad ka bol ka la poi ha ki kjat u Pro Pastor Balamight Marweiñ jong ka Pyndemumïong District uba la khyrwit ba kyndong bha jong ka kol bad wat lada u nongap kol ki ophisar u ka kynthih doh ïap ban ïoh pyllait sharud, hynrei um shym la lah bad ka bol kala rung beit kluk ha kol. Shaw risa ki paidbah.
Hadien ba ka kut ka 90 minit, ka jingïakhun kaba long kaba ïakhaid 1 la 1. Ha ka jingshisha ki nong pynïaid ki la phah ban pynlong beit da ka kick from the penalty spot ne ka tie breaker, hynrei ki nongïalehkai na baroh ar ki team, ki la kop ban ban ïakhun biang sa da ka extra time.
Dei ha ka extra time ba ki Pastor bad ki Ophisar ki la shisha ïa ka mynsiem ïakhun bad kaba la pynhun shisha ïa ki paidbah.
Hynrei ka jingïakhun ka la poi hi sha ka jingïakhaid 1 la 1. Ha ka tie breaker, ki Pastor ki la thep 6 la 5 kol ban ïoh ïa ka jingjop kaba nyngkong eh hadien ba ki la shah rem lynter haduh lai sien.
Ha kane ka jingïalehkai u Bah Vincent Pala, MP u la long u Kongsan bad wan plie ïa ka jingïalehkai bad u Bah Batskhem Ryntathiang, MDC Mairang, u la long u Kongsan Symbud.
