Nongpoh, Nohprah 09: Na ka dawbah ka jingrem noh u Bah George B. Lyngdoh kum u MLA ka Umroi Constituency ha ka election MLA 2024 kaba u la ïakhun na ka party All India Trinamool Congress (AITMC), ki nongïalam kane ka party naduh u Bah George B. Lyngdoh kum u President ka Umroi Block bad u State Vice president ka AITM ryngkat kiwei ki nongïalam ki la pyndkut noh ïa ka jingïadei da kaba ki la iehnoh kam noh na kane ka party halor ka jingkynnoh ba ki paidbah ka Umroi Constituency kim pat lah satia ban pdiang ïa kane ka party kaba wan na rithor.
Dei hadien ka jingphet noh kitei ki nongïalam bad ki dkhot na katei ka party AITMC, kine ki nongïalam ki la pynpaw ba ki la seng noh da kawei ka kynhun ba la tip kum ka Umroi Constituency Progressive Forum (UCPF), na ka bynta ban dang bteng ka jingshakri ïa ki paidbah bad ruh ka jingpynkhreh ban pynmih ïa u kyrtong shimet ban ïa khun ha ka election MDC 2025 na Umroi Constituency lyngba kane ka shatri jong kane ka Forum.
Haba kren sha ki lad pathai khubor mynta ka sngi, u Bah George B. Lyngdoh, MLA barim ka Umroi bad ruh u President barim ka AITMC na Umroi bad Vice President AITM ha ka jylla bad ryngkat u president ka Umroi Constituency Progressive Forum (UCPF) u Bah Pynskhemlang Sohtun, ki la ïathuh ba ka daw kaba ki la seng ïa kane ka Forum ka dei ka jingangnud ban dang shakri ïa ki paidbah ka Umroi Constituency bad ruh ban pynmih kyrtong ban ïa aireng ha kane ka election MDC 2025 na Umroi Constituency.
Ki la ïathuh ruh ba ki la shim ïa ka rai ban seng ïa kane ka Forum, ka dei tang ka rai jong ki nongïalam bad ki dkhot bad shuwa ban seng kane ka Forum ki la dep ban ïa phylliew jingmut naduh ki nongïalam, ki dkhot bad ki nongkyrshan na ki Unit bad ki Area bapher bapher ba hap hapoh ka Umroi Constituency.
Kum ka jingpyntip sha baroh ki paidbah hapoh ka Umroi Constituency, ki la ong ruh ba kane ka Forum ka la dep ruh ban thaw ïa ka Election Committee bad kino kino ki riew pawkhmat kiba kwah ban ïakhun ha kane ka election MDC na Umroi Constituency ki lah ban wan thep kyrteng, hynrei ka rai kaba khatduh na ka bynta ban pynïeng ïa u kyrtong ka dei ka rai jong ka Election Committee kaba hap ban bishar ne ïatai sani ïa uno uba ka party ka ibit ban ai ticket kum u kyrtong ban ïakhun ïa kane ka election MDC 2025 na Umroi Constituency.
Ki la ïathuh ruh la kumno kumno, lyngba kane ka Forum ki la rai ba ha bnai Kyllalyngkot 2025 kin sa pynbna noh shen ïa u kyrtong uba ka Forum ka la ibit ban pynïeng kum u kyrtong ban aireng sha ka election MDC 2025 bad hadien ka jingpynbna ïa u kyrtong ki la rai ruh ban trei borbah na ka bynta ban pynjop ïa u kyrtong uba ki la pynïeng na Umroi Constituency ba un poi sha ka thong jong ka jingjop.
Shuh shuh, ki la buh ruh ïa ka jingkyrpad naduh ki paidbah ka Umroi Constituency, ki nongïalam bad ki nongkyrshan ba kin ai ïa ka jingïatreilang bad kane ka Forum, khnang ba lyngba kane ka Forum kin lah ban pynmih ïa u nongmihkhmat paidbah ha kane ka election MDC ba ka thong jong kane ka Forum ka long ban shakri bad ban phaikhmat paidbah na ka bynta ka bha ka miat bad ka roi ka par jong ki paidbah hapoh ka Umroi Constituency, ki la bynrap.
