Hadien ba la pyllait ïa ki kali DFS Crime Scene Vehicle, la pynkupburom ïa ki pulit kiba trei shitom

Shillong, Nailur 29: U Myntri Rangbah ka Jylla Meghalaya u Conrad K Sangma ha ka sngi Nyngkong u la pyllait paidbah ïa ki kali ‘DFS Crime Scene Vehicles’ ba la mang sha baroh 12 tylli ki District jong ka Jylla ba kin lah ban pyndonkam ïa ki.
La ïathuh ba Ïa kine ki kali yn pyndonkam da ka forensic unit jong ka tnat Meghalaya Police. Ha kane ka sngi u Myntri Rangbah u la plie ruh ïa ka ophis Anti-Terror Squad (ATS) jong ka Meghalaya Police.
U Myntri Rangbah u Conrad Sangma ha ryngkat bad u Symbud Myntri Rangbah ba khmih ïa ka tnat Kam Pohïing (Police) u Bah Prestone Tynsong ki la shong jingïalang bishar bniah ba shisien shisnem bad ki SP bad CO ha Police Headquarter Shillong ha kaba ïadei bad ki kam Pohïing.
Ha kane ka jingïalang la pynlait paidbah ruh ïa ka MEGPOL, kaba dei ka buit wadbniah ba kham jylliew na ka bynta ki pulit ka Jylla bad ka Personnel Information Management System (PIMS).
Shuh shuh u Myntri Rangbah bad u Symbud Myntri Rangbah ki la pynkupburom ruh ïa ki Pulit ka Jylla Meghalaya na ka bynta ka jingtrei shitom jong ki ban lap ïa ka mukotduma pynïap briew ha Sohra, kumjuh ruh ïa kiwei pat ki ophisar na ka bynta ka jingjop jong ki ban pynbeit ïa ki mukotduma hapoh ka por kaba lyngkot bad ha ka por kaba biang.