Shillong, Jylliew 05: Ha ka janmied jong ka 3 tarik mynta u bnai, ka la don ka jingïashoh hapdeng uwei uba kyrteng u Johnlidar Khongji ba la 32 snem ka rta bad u Khrawborlang Khongdup ba la 30 snem ka rta, la ïathuh ba kine arngut ki la ïadih kiad lang hapoh ka ïing jong u Khrawborlang Khongdup ha ka shnong Nongeitniang (EKH), ha kaba hadien la mih ka huri hura ha kaba u Johnlidar Khongji la kynnoh ba u la thombor bad shoh ïa u Khrawborlang Khongdup da ka tari. Ha kane ka jingjia, na ka liang ki dkhot ka VDP bad ki riew rangbah jong ka shnong ki la leit ban tuklar noh ïa kane ka kam. Ïa kane ka jingjia la pyntip sha ki pulit bad ïa kine baroh arngut la rah noh sha PHC Pongtung, ha kaba la sumar noh ïa u Khrawborlang Khongdup hapoh kane ka jaka sumar. Kham hadien pat ki pulit ki la bat noh ïa u Johnlidar Khongji.
