Nongpoh, Naitung 08: Tang hadien ba la dep ban pynbna ïa u kyrtong ban ïa aireng ha kane ka election 2023 na Umsning Constituency bad kumjuh ruh ban dang pynkhlaiñ ïa ka party, ka Party HSPDP ha ka jingïalam u Bah Primson Makdoh kum u kyrtong ka party ka la lah ban dang pynkhlaiñ ïa ka party da ki nongïalam hapoh ki Primary Unit.
Ha ka jingïalam u kyrtong bad ki nongïalam ka party HSPDP, ka party HSPDP ha ka 6 tarik u Naitung 2022 ka la lah ban pynkha ïa ka tnad treikam ha Umtrew ba la tip kum ka HSPDP Umtrew Primary Unit bad ha kumjuh ha kane ka sngi la lah ban pynkha ïa ka tnad treikam ba la tip kum ka Lumkya Primary Unit ha ka shnoing Nongkya.
Ki nongïalam ka Umtrew Primary Unit ki kynthup ïa ka President ba la jied ïa ka Kong Dayota Nongrang, Vice president, Bah Weinsman Makdoh, General Secretary, Kong Tilinda Kharshiing, Organizing Secretary, Kong Kenneth Lyngdoh Nongpyiur, bad kynthup da ki spah ngut ki dkhot.
Ki nongïalam ka Lumkya Primary Unit pat ki kynthup ïa u President ba la jied ïa u Bah Theophilos Sohtun, Vice president, Samuel Syngkli, General Secretary, Donboklang Sohtun, Finance Secretary, Phansing Lamare, bad kynthup kiwei ki nongïalam bad ki spah ngut ki dkhot.
Kumba la ïathuh da u Bah Primson Makdoh kum u kyrtong ka HSPDP na Umsning Constituency, u la ong ba ka party HSPDP ha Umsning ka la dang suhthied bad bun ki paidbah ki la wan ban ai ka jingkyrshan halor ka nongrim jong ka party ban ai ka jingshakri lada ka wan ha ka bor hadien ka election 2023.
Shuh shuh, u la ïathuh ruh nalor ka jingdon lypa ki noingïalam ha ka Constituency bad ha ka District, ka party HSPDP na ka bynta ban dang pynkhlaiñ ïa ka party ka la ïaid shakhmat ban pynkha da ki tnad treikam ba la tip kum ki primary unit ha ki shnong bapher bapher ha Umsning.
