Hadien ba khlem shah khot sha jingïalang yn sa rai ki 5 MLA shano yn kyrshan

Shillong, Naitung 8 : Ki san ngut ki MLA ka Congress kiba shah sospon kin sa shim rai ïano kin kyrshan ha kane ka election president ban long ha ka 18 tarik namar ba ki khlem shah khot satia sha ka jingïalang ha Orchid Lake Resort, Umiam ha ka 6 tarik mynta u bnai ka sngi ba ka kyrtong ka NDA ka Draupadi Murmu ka wan pan jingkyrshan na ki MLA bad MP kane ka jylla.
“ Ngi ki san ngut kin sa ïashong bad shim ïa ka rai” ong i nongïalam jong ki san ngut i Dr Ampareen Lyngdoh.
I la ïathuh ba ki sangut ki MLA ba la shah sospon na ka Congress ba kynthup ïa i bah P.T Sawkmie,PT Sawkmie, bah Mayralborn Syiem, bah Mohendro Rapsang bad bah Kimfa S Marbaniang ki sngewdiaw halor kane ka jingbym shah khot sha katei ka jingïalang ba la pynlong da ka BJP ha katei ka jaka.
Haba la kylli hato ki lah ban ym leit thep vote ruh? I Dr Ampareen i la ong “ Ngin sa shim rai ha ka por ba biang eh lada ym lah ban pynbeit kloi ïa kane ka kam lane lada kim donkam ïa ki vote jong ngi kata ruh ka long da kumwei. Lehse san vote ki dang duna eh kumta ngim tip hynrei te kan long kaba sngewtynnad eh lada ïadon lang namar ngi ïatrei lang bad ka MDA. Hynrei ngin sa rai bad ngin sa pyntip paidbah hi ruh”.
Kane ka pynpaw shai kdar ba ki MLA ka Congress ki khlem ïatrei lang bad ka BJP. “ Kaei kaba ki nongïalam ka Congress ki ïa bunktien baroh shi katta haba tang sha katei ka jingïalang ruh ngi khlem shah khot namar ngi dang dei ki MLA ka Congress ka long kaba sngewsih” ong biang i Dr Ampareen.
Halor ka jingpynïakhun da ka kyrtong riewlum ia la ong ka long kaei kaei kaba itynnad ba ka BJP sa shisien ka pynlyngngoh ïa ka ri bad ka jaidbynriew ba kal a sei da ka kyrtong na ka jaidbynriew riewlum.Hynrei mynta pat ba ka la jia kumne te yn sa ïa pyrkhat bad ïashim ka rai halor kane.