Hadien ba jia ha NEIGRIHMS: Na Delhi yn dawa ki heh BJP ba ki eksam kam dei ban pynlong beit ha ka jylla

Shillong, Nohprah 07 : Ki nongïalam ka BJP Meghalaya ha ka sngi Balang ki la ïathuh ba shen kin sa leit shaduh Delhi ban kynduh ïa ki Myntri ba dei peit ban pyntikna ba ki eksam ïa khun kam kiba dei na bynta kane ka Jylla dei ban pynlong beit ha Meghalaya ym ban pynlong sha kiwei pat ki jylla.
Haba kren bad ki lad pathai khubor, na ka liang u Vice President jong ka BJP youth wing hadien ka jingkynduh ïa ki bor pynïaid jong ka NEIGRIHMS, u Bah Wallam Khongwir u la ïathuh ba dang shen ki la ïohi ba ïa ki kam nos kaba dei ha NEIGRIHMS Hospital la thmu ban pynlong sha kiwei pat ki jylla bad kane ka la ktah bad buh jingeh haduh katta katta ïa ki samla wat haba katei ka jaka sumar ka don ha kane ka jylla.
“Na ka liang ka BJP ngi kyntu ïa ki bor pynïaid jong ka NEIGRIHMS bad ki kompeni kiba shim ïa ka kam ba kin pynbiang ïa ki nongtrei khnang ba ïa ki eksam kam dei ban leh beit ha kane ka jylla,” u la bynrap biang.
Nalorkata, u ong, “Shen ngin sa leit sha Delhi ban ïa kren bad ki Myntri jong ka sorkar pdeng ban kyntu ïa ki eksam ïakhun kam ha ki tnad jong ka sorkar pdeng kiba don ha Meghalaya dei ban leh beit ha kane ka jylla.”
Haba bynrap lang, u MLA ka BJP na Shillong South, ba dei ruh u Myntri ka sorkar jylla, Bah Sanbor Shullai ula ïathuh ba hadien ba ka la mih katei ka jingpyrshang ban pynlong sha kiwei ki jylla ïa katei ka eksam, bun ki paidbah ki la ïaphone ban pynpaw ïa ka jingpyrshah. U ong ruh ba ki kmie ki kpa bun kiba syier ban phah ïa ki khun kynthei ban leit ïakhun eksam shabar nalor ba ka don ruh ka jinglut jingsep.
Kumta ban pynsuk ïa ki samla ka jylla u Bah Sanbor u la ong ruh ba na ka liang ka sorkar jylla ka kloi ban pynbiang ïa ki jaka na ka bynta ban pynlong ïa ki eksam kam.