Hadien ba ïap 9 ngut ki Nepali bad mynsaw 7 ngut bthah ka Nepal Embassy ban bishar bniah ïa ki kam

Shillong, Rymphang 13 : Hadien ka jingiap jong ki 9 ngut ki Nepali bad mynsaw jur 7 ngut ha ka jingbthei ka par dewiong ha Mynsngat- Thangsko ka Nepal Embassy ha India ka la pymih ïa ki jingbthah ïa ki nong Nepal, da kaba ka la kyntu ïa ki ba kin husiar bha bad ban nym ngop ha ki agent ba tyrwa aikam ha ki jaka ki bym shngaiñ. Ka la bthah ïa ki nongbylla ba kin da pynshisha shuwa ïa ki jingtip shaphang ki nongaikam, ka bai bylla, ki jingmyntoi ba ki ïoh bad ban pyndep ïa baroh ki jingdonkam kat kum ka aiñ hashuwa ban pdiang leit bylla.
Ka Embassy ka Nepal ha India, kala pynpaw ka jingsngewlem naduh ka mynsiem halor kine ki mynsiem briew kiba la duh ei ïa ka jingim ha ka jingbthei ka par tih dewiong beaiñ ha Mynsngat-Thangsko, East Jaintia Hills myn ha ka 5 tarik Rymphang, 2026.
Ha ka kyrwoh, ka Embassy kala pynthikna ba kine ki lanot kila duh ïa la ka jingim ha ka jingbthei bad phah ïa ka jingsngew lem sha ki longïing kiba shah ktah.
Ka Embassy ka la peit thuh bha ïa ka jinglong jingman ka koit ka khiah jong kine kiba mynsaw kiba dang shah sumar ha ki hospital bapher bapher bad kitbok ba kin koit noh.
La pyntip ba ka Embassy ka la ïatreilang khlem sangeh bad ka Ministry of External Affairs ka Sorkar India bad kumjuh ruh bad ki bor pynïaid District bad ki Pulit, ban pynthikna ïa ka jingsumar kaba biang, bad ka jingai jingïarap ïa ki lanot bad ki longïing jong ki.
Ki longïing kiba kwah ban ïoh ïa ki jingtip lane ki jingïarap ki lah ban phone sha ka Embassy ha u nombor +91-9205195035.
Kat kum ka kyrwoh, ka par dewiong kaba bthei lah ong ba ka dei kaba pyntrei beaiñ. Ka Embassy ka la maham ba ka jingtrei bylla ha ki par dewiong ba khlem ïoh jingbit bunsien ka ju buh jingeh ban wan ki nongïarap bad buh jingeh ban pynïoh ïa ka bailutksan bad kiwei ki jingmyntoi haba don kino kino ki jingjia ki bym lah ban tip lypa.