Hadien ba hiar ïuhkjat u Myntri Rangbah thrang u Myntri ban kyntiew ïa ka Heritage Tourism ha ïewduh

Shillong, Jymmang 20 : U Myntri ki kam Jngohkai Bah Paul Lyngdoh ha ka sngi Ba-ar, ula ban jur ïa ka jingdonkam ban ïatreilang bad ïatehlok hapdeng ka Sorkar Jylla, ka KHADC bad ka Hima Mylliem ban wanrah ïa ki kam jngohkai na ki jingtei ba don ïa ki khana pateng (heritage tourism) bad ki kam jngohkai halor ka kolshor (cultural tourism) kum ki kam ba kongsan jong ka ïewduh-kaba dei ka ïew tynrai kaba rimduh bad ba hehduh hapoh ka thain Shatei Lam Mihngi.
Haba ïakren bad ki nongthoh khubor, u Bah Paul ula ong “Ki lad ki lynti ki don bun bah. Kane ka donkam ïa ka jingïatreilang, ka jingïatehlok bad ki paralok ba hakhmat eh ki dei ban long ka Sorkar Jylla, ka KHADC bad ka Hima Mylliem. Shisien ba ngi la don ha kajuh ka thong, ngi lah ban phaikhmat ka ki kam jngohkai na ki jingtei ba don ïa ki khana pateng bad ki kam jngohkai halor ka kolshor kum ki kam ba kongsan jong ka ïewduh”.
Ula niew ruh ïa ka jingleit ïuhkjat jong u Myntri Rangbah ka Jylla Conrad K Sangma ha ïewduh kum ka sienjam kaba khraw bha ban pynïadei bad ki nongsengkam, ki nongkhaïi bad ki nongshong dukan wat bad ki nongwan ïew wan hat.
“Ngi kmen shibun ba kane kala jia hadien ki phew phew snem ha kaba u Myntri Rangbah ryngkat ka jingsynran ki arngut ki Myntri Sorkar, kila leit dalade ban ïuhkjat ha ïewduh bad ïoh ïakren ïa ki jait ba ki jait ki nongkhaïi bad nongshongdukan bad ruh ki briew, kiba ïoh jingmyntoi na ka ïewduh” ula ong.
Haba pynpaw ba ka ïewduh kum ka ïew tynrai kaba hehduh ha ka thaiñ Shatei Lam Mihngi ka donkam ïa ka jingpynwan dur thymmai namar bala bun phew snem la shu ieh ïa ka, u Bah Paul ula ong “Ngi kam ba hynnin ka sngi ngi la pynbna ba nalor ka 6 klur tyngka ka jingtheh pisa ban pynwan dur thymmai ïa ka ïewduh, ngi la rai ruh ban ai biang ïa ka song pisa sa 15 klur tyngka-kaba mut ba baroh ka long T.21 klur ban shna pynbha ïa ki nala, ki jingtei, ka bording elektrik, ka um naba bun ki pipe um kila pei- kumta, kane kan ïarap bha ha ka ban weng ïa ki jingeh ba ki nongkhaïi bad ki nongshong dukan ki mad mynta”.
U Bah Paul ula pyntip ruh “Ki la don ruh ki katto katne ki jingbthah bala ai sha ki Tnad ba dei khmih kum ka MeECL ba kan bujli noh mardor ïa ki post elektrik, kiba la kem sarang. Ngi khmih lynti ba shisien ba la pynmih ïa ka tender, ngi dei ban lah ha kaban pyntreikam ïa ka project hapoh ki lai bnai ban wan”.
Haba kylli, u Bah Paul ula ong “Hooid, ka dei kaba phi ong ba ka ïewduh ka hap hapoh ka jingpynïaid jong ka KHADC bad ka dei jong ka Hima Mylliem hynrei ha kane ka kam, naba da ki spah bad hajar ngut ki briew ki rung ki mih bad die ïa ki mar jong ki ha ïewduh bad ki don ruh da ki spah bad hajar ngut ki nongshongdukan bad ki briew ba shong dukan madan, ngim don lynti da kumwei pat hynrei ban ïarap lem namar ka ïew kala rim bad kala jot”.
“Kane hooid, ka dei ka dak ka jingkwah ïarap monsngewbha na ka liang ka Sorkar hynrei ngi khmih lynti ba ka Hima Mylliem bad kumjuh ruh ka KHADC kin leh ïala ka jong ka bynta khnang ban nang lah weng shuh shuh ïa ka jingjynjar jong ki briew ha ïewduh” ula bynrap.