Shillong, Lber, 22: Ka Ingbishar High Court ha ka sngi Baar ka la pynkut noh ïa ka mukotduma ba la ujor Suo Moto pyrshah ïa u MLA jong ka North Shillong Constittuency u Bah Adelbert Nongrum mynba u dang long u MDC bad Chief Executive Member (CEM) jong ka Khasi Hills Autonomous District Council (KHADC) ha u snem 2015.“Kum ban shu pynkynmaw hangne, ka Registrar General jong ka Iingbishar Meghalaya High Court ka la ujor Suo Moto pyrshah ïa u Bah Adelbert hadien ba u la kynthoh pyrshah ïa ka Ingbishar hadien ka jingsloit noh ïa ka iktiar jong ki Rangbah Shnong ha u snem 2015.“Ha u bnai Jymmang, 2015, ka Ingbishar ka la phah kem ïa u Bah Adelbert Nongrum da kaba phah set along ha Shillong District Jail ha ka por 9:30 baje mynmiet ha kaba ïadei bad ka jingkren kheiñ dewthala ïa ka rai jong ka Ingbishar katba u dang shong shah thngan ha syndah u motdur jong u Kiang Nangbah ban dawa ïa ka Sorkar Jylla ba ka dei ban ai jingmynjur ïa ka Village Administration Bill, 2014.“Ïa u Bah Adelbert Nongrum uba la shah khot hajir hakhmat ka Ingbishar na ka bynta ka jingshah tian bishar, la synran da ki dkhot ka Hynñiewtrep Youths Council (HYC) kiba la ap shabar ka phalor jong ka Ingbishar katba ka jingtian bishar ïa u Bah Adelbert ka dang ïaid shakhmat.“Ha ka hukum ba la pynmih mynta ka sngi Baar ka Ingbishar Meghalaya High Court ka la pynkut noh ïa kane ka mukotduma hadien hynñiew snem pyrshah ïa u Bah Adelbert Nongrum.““Namarba u nongshah mudui u la phah ïa ka Affidavit bad ka hukum kaba hashwa ka lap ba ki nongshah mudui (ba kynthup ïa u Bah Adelbert bad ki nongïalam ka HYC) ki la phah ïa ka jingpynshai lyngba ka Affidavit, namarkata, yn ym shim shuh ïa kano kano ka jingpynshitom halor kane ka kam. La pynkynmaw ïa ki nongshah mudui ba la ailad ïa baroh ïa ki nongshong shnong ba ki don ka hok ban ai ïa ki jingkynthoh kiba tei ïa kano kano ka shlem treikam, ki jingkynthoh lamwir ki pynhiar dor ïa ka burom jong ka Iingbishar bad ki pyntroiñ ïa ka bor ka iktiar jong ka Ingbishar,” la ong ka hukum ba la pynmih da u Judge u Bah W. Diengdoh bad u Chief Justice u Sanjib Banerjee.“Ka Ingbishar ka la pynkut ruh ïa baroh ki jingpan jamin jong u Bah Adelbert bad ha kajuh ka por ka la weng noh ïa ki kyndon ba la pynngat pyrshah ïa u ha u snem 2015.““Nga sngewkmen ba la pynkut noh ïa ka mukotduma hadien ba la ïaid lynti la hynñiew snem kynthih bad nga ai khublei ruh ïa ka Ingbishar Meghalaya High Court kaba la pdiang ïa ka jingpan map jong nga. Ngan ïai kohnguh bad nga don ka jingshahniah kaba skhem ha ka riti synshar jong ka ri India bad ha ka Ingbishar,”ong u Bah Adelbert ha ka jingïakren bad u Nongthoh khubor.
