Nongpoh, Jymmang 28: Hadien 7 snem ka jingïaid lynti bad hapdeng shibun ki jingeh kum kawei na ki Pastorate ka ba dang rit bad kaba duna paid, ka Narleiñ Shatei Pastorate, Ri Bhoi Sepngi Presbytery mynta ka sngi ka la lah ban plie paidbah syndon ïa ka ophis treikam kaba pura haka shnong Umta, Ri Bhoi District.
Ïa katei ka ophis treikam bala mang pisa kumba T. 2 lakh haka wat ba nyngkong lyngba ka skhim SRWP 2022-23 la wan ban plie paidbah da u Bah Mayral Born Syiem MLA ka Nongpoh kum u kongsan haka jingdonlang u Rev RM Mutkieh Pastor InCharge ka Narleiñ Shatei Pastorate, ki nongkitkam ka Pastorate, Jingïaseng Kynthei, CE Union, ki tymmenbasan bad kiwei kiwei.
Namar ka jingnang bun ki kam ba dang hap ban pyndep katkum ki jingdonkam ban dang pynbha bad pynjannai shuh shuh ïa katei ka ophis, na ka liang u MLA u la kular ruh ban nang bteng ka jingïarap sha katei ka Pastorate khnang ba kin lah ban pyndep pura ïa katei ka ophis haka rukom kaba janai.
Haba kren ha katei ka sngi kum u kongsan na ka liang u Bah Mayral Born Syiem u la ong ba kane ka dei ka sngi kaba kmen namar na ka liang ka trust committee naduh ba sdang u snem 2022 la ïoh ban ïakren ban mir jingmut bad kum u MLA u la kular ruh ban ïarap ban ïoh ban sdang ïa ka kam bad hadien katto katne snem mar sien iuh kjat biang ha katei ka jaka haba ïohi ba ka iing ka la ïeng katno ka long ka jingkmen namar ka jingïarap ka long tang khyndiat hynrei kaba bun hi la pynlut da ka pastorate.
U la ong ruh ka jingïarap bunsien hi ka leit sha kito kiba trei shitom bad kiba donkam shisha ïa ka jingïarap, kumba katei ka pastorate ka dang dei kaba rit hynrei ka jingjop kam shong haka jingbun paid hynrei haka jingïatylli bad ka jingnang jong ki nongïalam kumno ban shakri bad ban pyntyllun ïa ki kam.
