Shillong, Jymmang 31 : Ka dei hadien bun phew snem ba ka skul sorkar ha Wahrynghaw kaba shakri naduh u snem 1972 ba kan ïoh da ka iingskul kaba thymmai bad kaba skhem kaban ïa ryngkat dor lem bad kiwei pat ki skul.
Ïa katei ka iingskul kaba la shna ha ka jinglut kaba kot sha ka 37,80,000 tyngka la plie paidbah da u MLA ka thaiñ Bah Samlin Malngiang ha ka jingïalang kaba la donlang naduh ki kmie ki kpa, ki bor pynïaid skul bad ruh ki khynnah skul. Katei ka iingskul ha Wahrynghaw kadei ruh kaba nyngkong na ki san tylli ki skul kiba ïoh da ka iingskul ba thymmai ha Sohiong constituency.
Na ka liang u MLA haba kren kum u Kongsan ha kane ka sngi u la ong ba bun ki ki kmie ki kpa ki kham jied ban phah skul ïa ki khun ha ki skul shimet bad kyntait ban phah ha ki skul sorkar namar ki ïohi ba ki skul shimet ki kham i shngaiñ bad kham i don ka discipline.
Da kaba kdew ba ka daw tynrai hi kadei namar bun ki iing skul jong ka sorkar ki dei kiba jot, u Bah Samlin u la ong ba mynta ki nongshong shnong katei ka thaiñ kim dei shuh ban tieng ban phah ïa ki khun ha katei ka skul sorkar namar ka jingtei kadei kaba la skhem bad paka bha nalor ba ki don ruh haduh sawngut ki nonghikai kiba tbit.
U Bah Samlin u la ai ruh ka jingïaroh ïa u kontraktor uba la pyndep ha ka por kaba biang ïa katei ka iing skul namar baroh shi katta ki nonghikai ki la shu pynlong skul ha iing ICDS kaba buh jingeh haduh katta katta namar ka jingkhapngiah.
Shwa kane, u Secretary Shnong ka Wahrynghaw u la ïathuh ka shnong la slem bha ki la angnud ba kin ïoh noh da ka iingskul kaba skhem na bynta ka jingshngaiñ jong ki khynnah skul namar katei ka skul kadei kaba la rim bha kaba la seng naduh ki snem 1972.
U la ong ruh ba mar ïa jop u Bah Samlin na ka liang ka shnong ryngkat bad ki bor pynïaid skul ki la leit ban pynsngew ïa ka jingeh kiba bun kiba kynduh na ka daw ba ka iingskul ka la jot rathai. “Ngim poi pyrkhat satia ba ngin ïoh pynban da ka iingskul kaba heh haduh katne. Ha katei ka por ngi leit ban pan tang ban ïoh maramot ïa ka iing skul hynrei na ka liang jong i, i la kular pynban ba in thaw lad syndon ban pynïoh da ka iingskul thymmai.”
Ha kane ka sngi la ïoh ruh ïa ka jingkren na u Symbud Kongsan ba dei ruh u Chairman ka KHADC bad MDC ka Mawphlang Bah Lamphrang Blah, nangta u MDC ka Sohiong Bah Sherbor Mawlong, na u Lyngdoh ka Mawphlang nalor ki nongïalam shnong na ki shnong ba marjan.
