Shillong, Naitung 17 : Shi bynta na ka 884 Km ki bynta khappud hapdeng ka Assam bad Meghalaya la hap jurip bad dro laiñ biang da ka Survey of India (SoI) bad kane ka long hadien 50 snem ba la dep phiah ïa ka Meghalaya na Assam.ïa kane la leh hadien ba ki ar jylla ki la ïa mynjur ban ïa pynbeit shwa ïa ki hynriew tylli ki jaka ba ïakajia na ki 12 tylli kiba la dep pruid dak. Kane ka long hadien ba la dep ïasoi ia ka soskular ban pynbeit pud ne ka Memorandum of Understanding (MoU) hapdeng jong u Myntri Rangbah ka Meghalaya u Conrad K Sangma bad u Himanta Biswa Sarma ha u bnai Lber mynta u snem.
U Myntri Rangbah ka Assam u Himanta Biswa Sarma ha ka Sngi Saitjaiñ u la ong “ ïa kane la leh ban ïa pynbeit noh ïa u pud u sam ym tang bad ka Meghalaya hynrei bad ka Mizoram, Arunachal Pradesh bad ka Nagaland ruh namar nga thrang ban pynurlong ïa ka jingthrang jong u Myntri Rangbah duh ka India u Narendra Modi bad u Myntri kam pohïing ka ri U Amit Shah ban pynbeit ïa u pud u sam bad wanrah ka jingïalong kawei ki jylla kane ka thaiñ shatei lam mihngi ka ri India ha ka jingrakhe ïa ka jingdap 75 snem ka jingïoh laitluid ka India ne ka Azaadi ka Amrit Mahotsav” ong u Himanta.
U Himanta ha ka Sngi Saitjain u la ong shuh shuh “ ïa kine ki hynriew tylli ki jaka ba ia kajia hapdeng ka Meghalaya bad Assam la dep ïa pynbeit bad kaba sah mynta ka long ba ka SoI kan jurip bad dro laiñ biang ïa u pud u sam ba thymmai jong ki ar jylla bad hadien kata kan sa ai kopi ïa ngi ïa uta u pud u sam ba thymmai khnang ban ïoh sdang pat ïa ka bynta kaba ar kaba dang sah pat sa hynriew tylli ki jaka”.
“ Kane ka bynta kaba ar kaba dei ka Langpih, Block I bad Block II ka long kaba kham eh bha hynrei wat la katta ruh ngin ïatrei lang bad ngin ïa pyrshang beit ban ïa pynbeit da kaba ïa sngewthuh jingmut”.
Hadien ba ka SoI ka la dep jurip bad ai ïa u pud u sam ba thymmai yn sa rah ha ka ïing dorbar Parliament ban ai ka jingmynjur da kaba pynkylla ruh katto katne ki kyndon ba thymmai jongka North Eastern Region (Re-organisation) Act 1971 bad kane ka long hadien ba la dep mynjur da ki ïing dorbar thawaiñ jong ki ar jylla.
