Darrang, Nohprah 15: Hadien ka jingjah kaba la jan laiphew snem la pynim biang ïa kawei na ki jingïalehkai ïakop kieng lieng kaba la pawnam ha wah Umngot— kaba la tip paidbah kum ka Sport Lieng, ha Darrang ha ka 12 bad 13 tarik u Nohprah, kaba la wanrah biang ïa ka jingïalehkai tynrai kaba la jah slem bha jong ki jaitbynriew Khasi–Jaiñtia kiba shong basah harud ka wah Umngot.
ïa kane ka jingïalehkai ba pawnam la pynlong kum shi bynta jong ka tamasa Tri Hills Festival kaba 4 bad ka la long ka por kaba kongsan ha ka jingpynkhie im biang ïa ka kolshor jong ka Meghalaya.
La pynlong khatduh eh ïa kane ka jingïakop kieng lieng, kaba dei ka kolshor kaba la rim bha jong kane ka thaiñ, ha u snem 1997 ha Dawki ha ka wah Umngot. Ka jingpynim biang jong ka hadien 28 snem ka la khring ïa ki nongpeitkai kiba bun bad ka la ïoh ïa ka jingïashim bynta kaba bun tam haduh mynta, kaba la tam palat wat ïa ki sienjam ba la pynlong naduh lai phew snem mynshwa.
ïa kane ka lympung la pynlong da ka Elaka Darrang ryngkat ka jingkyrshan na ka tnad Arts and Culture jong ka sorkar Meghalaya. La kaweh lama ban sdang ïa ka jingïakop da u Bah Frederick Roy Kharkongor, Principal Secretary ka tnad Arts and Culture jong ka Sorkar Meghalaya ryngkat bad u Eoghan O’Regan, uba dei u Khlieh jong ka Sorkar Welsh ha British Deputy High Commission. Ha kane ka sngi la ïadon lang ruh u Bah P. Lymba, Dolloi ka Elaka Darrang, u Bah Alan West Kharkongor, President ka Meghalaya River Tourism Forum (MRTF), bad katto katne ngut kiwei pat ki riew rangbah.
Haba ai jingkren ha kane ka jingïalang, u Bah Frederick Roy Kharkongor u la pynpaw ïa ka jingkmen bad jingsngewhun halor ka jingjop ban pynim biang ïa kawei na ki jingïalehkai tynrai jong ka Meghalaya kaba la jah noh.
“Ka Tri Hills Festival kam dei tang ka rynsan ban lehkmen bad pynbyrngia, hynrei ka dei ka jingthmu kaba don jingmut kaba thmu ban ïada, pynneh pynsah, bad pynriewspah ïa ka kolshor ba riewspah bad ba bun jait jong ka jylla,” la ong u Bah Frederick Roy.
Na ka liang jong u O’Regan, u la ïaroh ïa ka jingitynnad jong ka mariang jong ka Meghalaya— ki lum, ki jaka, bad ki wah— bad u la ban jur ïa ka jingdonkam ban pynneh pynsah ïa kum kine ki riti dustur tynrai bad ban pynïar ïa ki sha ki pateng ban wan.
U Bah Alan West Kharkongor, uba la pynwandur ïa kane ka lympung ryngkat bad ka kynhun jong u ha Weskin Enterprise, u la pynpaw ba ïa kane ka tamasa Tri Hills mynta u snem la thmu ban rah shabar jong ka nongbah Shillong da ka jingthmu ban lap biang bad ban pyni ïa ki riti dustur ba dang duna kiba tip jong ka jylla. U la kdew ba ka Umngot Boat Race ka pyni ïa ka jingïadei kaba jylliew ha ka jinglong mynsiem bad ka kolshor hapdeng ki briew bad ki wah ba kyntang jong ki, ha kaba ki jingïalehkai kum ka boating, swimming, bad water diving ki long shisien ka bynta ba kongsan jong ka jingim ba man la ka sngi.
Kane ka Umngot Boat Race ka la sakhi ïa ka jingïashim bynta shitrhem na ki nongshong shnong jong ka shnong Darrang, Dawki, bad Shnongpdeng. Ki nongñiah lieng shynrang bad kynthei, ki samla, ki khynnah, ki samla bad ki rangbah ki la pynrung kyrteng bad ïakhun ym tang ha ka Boat Race hynrei wat ha kiwei pat ki jingïalehkai kiba ïadei bad ka um, kynthup ïa ka water polo.
Kaba sngewtynnat shuh shuh ka long ba katto katne ngut ki nongïashim bynta kiba la ïashim bynta ha ka jingïakop kieng lieng kaba khatduh kaba la pynlong ha u snem 1997 ruh ki la ïashim bynta mynta u snem. Mynta ki la palat 80 snem ka rta, ki la pynpaw ïa ka jingkmen bad jingsngewnguh kaba khraw eh ba ki la lah ban ïoh mad biang ïa ka dustur kaba kim khmihlynti shuh ban dang sakhi.
Ha ka thup ïakop jong ki shynrang, ïa ka khusnam ba nyngkong la rah da u Charlie Ryngksai bad ka kynhun jong u, bud sa u Barist Pohktai ha ka kyrdan ba ar, bad u Henry Ryngksai bad ka kynhun ki la ïoh ïa ka kyrdan ba lai. Ha ka jingïakhun jong ki kynthei, ka kynhun jong ka Shibakha ka la long ka nongjop, katba ïa ka kyrdan ba ar la khur da ka Geeting Kongwang bad ïa ka kyrdan ba lai la ïoh da ka kong Rose Ryngksai bad ka kynhun.
U Myntri ka tnad pule puthi uba dei ruh u MLA ka thaiñ u Bah Lahkmen Rymbui, u la wan ban ïashim bynta ha kane ka jingïalang sam khusnam bad ai ruh ïa ki khusnam sha ki nongjop ha ryngkat ka Director ka tnad Arts and Culture ka kong Iadashisha Majaw.
ïa ka jingïalang la pynkut da ka put ka tem, ha kaba ki nongrwai bad ki kynhun tem jong ka thaiñ kum ka Na U Bnai, ka Pynter Orchestra, ka Dalariti, ka Enibha War, ka Sur Na Nongkyndong, ka Khun U Woh, ka Summersalt, bad ka Snowhite ki la pynshongshit ïa ki nongpeitkai.
