Hadien 220 kynta ba shah thngan hap ai drip ki doktor ïa u Bah Ardent

Shillong, Jymmang 31: Ka jingïakhih shong shah thngan u Bah Ardent kaba la kynjoh sha ka sngi kaba kyndai ka la poi haduh u pud ba ki dotkor ki la hap ban ai drip ban ïada na kino kino ki jingma ha ka met jong u na ka daw ka jingtyrkhong ka met.
Kane ka jinghap ai drip ki dotor ka dei hadien ba ki la wan ban leh ïa ka eksamin kaba ki ju leh man la ka sngi bad ynda ki la eksamin ïa ka koit ka khiah jong u la lap ba ka met jong u ka tyrkhong kaba la pynlong pat ïa ki ban ai da ka drip Intravenous Fluid ban ïada na kino kino ki jingma na ka met na ka daw ka jingtyrkhong na ka daw ka jingshah thngan.
Kane ka jingai drip ki doktor ka long hadien 220 kynta ba u Bah Ardent u la sdang ïa ka jingshah thngan.
Kat kum ka tyllong khubor ba la ïohlum na ka tnat ka koit ka khiah ka la ong ba ha ka met u Bah Ardent ka jingdon ka shini bad ka mluh ka la duna bad lada u bteng ban shah thngan kan buh jingma ïa ka koit ka khiah jong u namar tang ka drip kan ym lah satia ban ïarap namar ka jingdonkam ka met kan ym lah satia ban pyndap.
Haba kren sha ki paidbah kiba ïalum ban sngap ïa ka jingpynbna na ki nongïalam ka VPP u Bah Ardent u la ong, “Hadien ba ka jingshah thngan ka la jam sha ka sngi kaba 9 bad lashai ka sngi kan kynjoh pura 9 sngi kum u briew nga sngewthuh ba ka don ka jingtlot ha ka met hynrei wat la katta da ka jingleh phylla u Blei kam don kano kano ka jingktah ïa ka koit ka khiah jong nga bad nga sngewnguh ïa u Blei uba dang ai bor ïa nga,” u la ong.
U MLA ka Nongkrem uba dei ruh u President ka VPP u Bah Ardent M Basaïawmoit u la ba na ka liang jong u un ym pat mih na katei ka jaka ban leit phai noh sha ïing hadien ba ka sorkar ka la kular ban thung da ka expert committee ban peit biang ïa ka Reservation Policy.
Haba kren ha ka jingïalang ba lyngkot u Bah Ardent u la ong ba dei ka jingkyrshan u paidbah kaba la pynlong ïa ka sorkar kaba la pynpaw ba kan pdiang satia ïa ka jingdawa ban pynkylla ïa ka Reservation Policy, ‘hynrei ki la kular ban thung da kata ka komiti ba kyrpang bad na ka liang jong nga katba ym pat ïoh da ka jingthoh ba la thung ïa ka komiti ngan ym shah thngan’.
“Ngan ym leit phai ïing kum uba rem na kata ka daw nga la rai ban bteng ban shong shah thngan hangne bad na ka liang jong nga nga kyrpad ïa ki paidbah ba phim donkam ban pynshitom ïalade ban wan synran ïa nga hynrei ai ba tang ki katto katne kiba la buh kin synran ïa nga,” u la bynrap.
U la ong ruh ba na ka liang jong u ha kine ki khyndiat sngi kiba la leit um shym la lah ban ïohthiah bha namar ka jingbun ki paidbah kiba wan synran ïa u sha kane ka jaka ba u shah tngan.
“Ki don kiba kylli la nga ïohthiah bha ne em bad nga jubab beit ba nga ïohthiah bha khnang ba ki paidbah kin ym syier mynsiem ha ka jingshisha nga dei u jait briew uba lada riew i jingsawa ba rit eh ruh nga la kyndit noh na ba thiah,” u la ong.
U la ong ruh ba ka sorkar kam dei ban pynslem ïa ka jingpynbna ïa ka jimngthaw ïa kata ka komiti bad ba ka dei ban sngewthuh ïa ka jingsngew u paidbah.
“Ki nongsynshar kim dei ban shim sting ïa kane ka jingkwah u paidbah bad nga tip ba lada ngi kwah ban sei da ki lak ngut ki paidbah ban tawiar ïa ka jaka long jingïalang ruh ki don hynrei ngim kwah ban jied da kata ka lynti na kata ka daw kim dei ban lehkai bad u paidbah,” u la ong.
“Kane ka jingïakhun kam dei ban long ka burom jong nga ne jong phi hynrei sha u Blei kumba la pynkynmaw ha ka Kitab Psalm ba 115,” u la bynrap.