Nongpoh, K’Lyngkot 20: Hadien 22 snem ka jingïaid lynti jong ka skul Seng Kynthei Pre-Primary School haka shnong Mawrong bala hap ban shu shong tang haka iing jong ka shnong, katei ka skul mynta ka sngi kala ioh syndon da ka iing building kaba pura lyngba ka jingkynshew kaba rit kaba la lum na uwei u snem sha uwei pat ryngkat ka jingïarap ki riew shimet.
Ïa katei ka iing skul la wan ban plie paidbah syndon da u Bah James Sylliang MDC barim ka Mawhati Constituency ba long ruh uwei naki kyrtong ban ïakhun ïaka elekshon MDC ha kane ka samoi ba mynta u ba don bynta ruh ban ïarap ïa katei ka skul haka por ba u dang long MDC.
Ha katei ka sngi la sakhi ruh da ka jingdonlang u Bah BB Makdoh Rangbah Shnong ka Mawrong, ka kong CK Makdoh President ka jingïaseng Kynthei, ryngkat kiwei kiwei ki nongkitkam ka jingïaseng kynthei bad ki riew rangbah.
Haba batai ïaka History lyngkot jong katei ka skul ka kong P shylla kaba dei kawei naki nongkitkam jong ka jingïaseng kynthei kala ïathuh ba katei ka skul mynta kala kynjoh 22 snem ka jingïaid lynti naduh ba la sdang ïaka ha u snem 2002, bad kam don wat tang ka iing skul ba pura hynrei lyngba ka jingtrei shitom ka jinglen lade jong ki bor pynïaid katei ka skul kala nang kiew katba nang mih ki sngi wat na ka jinglum kaba rit kaba kum ki longkmie ki lah ban pynlang.
Dei ha kane ka kynti ha kaba mynta da ka jingkynshew kaba rit jong ki para longkmie, kumjuh ruh ka jingnoh synñiang ki riew shimet, kynthup ruh u Bah James Sylliang haka por ba u dang long kum u MDC ka Mawhati Constituency la ioh ban pyndep ïaka iing skul bad la lah ban plie syndon mynta ka sngi hapdeng ka jingiphuh iphieng.
U Bah James Sylliang kum u kongsan haba kren ha kane ka sngi u la pynpaw ka jingsngewkmen kaba khraw hadien bun snem ka jingïaid lynti hapdeng bun ki mawsiang bad ki rai eh rai dam katei ka skul mynta kala ieng hala ka nongrim naka bynta ban ai ka jingshakri ban long kum kawei naki shlem hikai naka bynta ki khynnah rit ha katei ka thaiñ.
U la kyntu ruh ïaka seng Kynthei ban ïa trei ryngkat ban dang lah shuh shuh ban ai ka jingshakri sha ki heprit katei ka shnong, bad u la ong ruh ba wat la ka dei ka jingai kaba rit, u la ong pat ba “ka shi jaw jong ka um ka pynlong ïaka duriaw bah”.
