Hadien 20 snem ïoh rung ka India sha ka AFC U20 Women’s Asian Cup

Yangon (Myanmar), Nailar 10: Ka kynhun ïalehkai phutbol U20 jong ki kynthei jong ka India ka la ïoh ban rung sha ka AFC U20 Women’s Asian Cup ha ka sien kaba nyngkong hadien 20 snem, hadien ba ka la pynliem ïa ka Myanmar da 1-0 kol ha ka jingïakhun ba khatduh jong ka Group D ha Thuwunna Stadium ha Yangon, hynne ka Sngi U Blei (10 tarik Nailar, 2025).
Ka India ka la pyndep ha ka kyrdan ba nyngkong jong ka Group da kaba kamai hynñiew poiñ, hadien ba ka winger ka Pooja ka la thep ïa ka kol ha ka minit kaba 27 kaba la pynlong ïa ka India ban jop hakhmat ki paidbah kiba la wan sakhi ïa kane ka jingïakhun.
Ha kaba nyngkong, la synshar ïa ka jingïalehkai da ka India, katba ka Myanmar ka la tehlakam ïa ka jingïalehkai ha ka kylla miet. Ka Neha bad ka Sibani Devi Nongmeikapam ki la ïatrei lang ban thaw ïa ki lad naduh ka minit kaba lai, ha kaba ka Sibani Devi ka la lait salit ban thep ïa ka bol pashat kaba thikna na ka Neha.
Katba ka kynhun ba la ïalehkai hala ïing ka la hap ban shah ïa ka jingshah ñion jan baroh ka kylla step, hynrei ka la ïoh ruh katto katne ki kabu da kaba rah kyndit kyndit ïa ka bol shakhmat, bad ka la don ka khyllipmat ba ka Su Su Khin ka la jan sa khyndiat ban pynkhihjar ha ka minit kaba 9, hadien ba ka la ïohpdiang ïa ka bol kaba thikna na ka Yin Loon Eain.
Katba nang ïaid ki minit ka Myanmar ka la sdang ban ïalehkai jai jai, hynrei ka India ka la lam khmat lyngba ka Pooja shuwa ban jam sha ka 30 minit. Dei ka Pooja hi, kaba la sdang ban rah ïa ka bol shakhmat shuwa ban pashat ïa ka bol sha shiliang na ka bynta ka Neha. Hadien nangta kane ka paralok ka la pynrung biang ïa ka bol na ka bynta ka Pooja, kaba la leh ïa kaba kongsan ban thep ïa ka kol.
Watla katta ka kylla miet ka la long kaba pher bak-ly-bak. Da ka jingkyrshan kaba jam jong ki paidbah ha la ïing, ka Myanmar ka la wan sha ka kylla kaba ar ha ka rukom kaba kham khlaiñ, bad ka nongap kol jong ka India ka Monalisha Devi ka la hap ban ïada ïa ka jingpyrshang ha ka minit kaba 48 ban khanglad ïa ka Su Su Khin.
Ka India ka la hap ban pyneh triang shadien, katba ka la ïai bteng ïa ka jingthombor jong ki. Wat hapdeng ka jingshah ñion kaba jur, ka India ka la bat skhem ïa ka jingjop jong ka ban pynthikna ïa ka jingïoh rung ha ka sien kaba nyngkong hadien ki arphew snem.