Shillong, Nailur 18: Ka Ïingbishar High Court of Meghalaya mynta ka sngi ka la ai jamin noh ia u Bah Wallam Jingsuk Barim, uba la shah set phatok halor ka jingkynnoh ba u donkti ha ka jingpynbthei bom IED ha Khyndailad ha u snem 2022.
Ka Ïingbishar jong ki 2 ngut ki Nongbishar u Justice W. Diengdoh bad u Justice B. Bhattacharjee, ha ka jingshim bishar ka la ong ba kam i don jingkyrmen ne ka jingkyrmen ba ka jingbishar kan poi sha kaba kut ka long sting bha. Ka daw kadei namar ba haduh mynta napdeng ki 60 ngut ki Sakhi dang lah ban khot sakhi tang 15 ngut. Kumta kam long kaba dei ban set sah ia u hadien ba la set phatok ar snem shiteng.
Lah ban kdew hangne ba u Bah Wallam u la shah kem halor ka jingkynnoh ba dei ma u, uba pynbiang ia ki tiar pynbthei sha u ba shah kynnoh ba dei ma u uba pynbthei ne u main accuse. La shimti ban tohkit ia kane ka jingpynbthei bom da ka National Investigation Agency ha kaba ka la pynngat ia u ha ki kyndon jong ka Explosive Subdtance Act 1908 bad ka UAPA 1967.
