Hadien 2 snem jong ka khlam Covid-19, yn shad Behdeiñkhlam mynta ka snem khlem jingmana

Jowai, Naitung 06: Ka lehñiam shad Behdeiñkhlam jong ka Seiñ Raij Jowai mynta ka snem kaba la tip kum ka ‘Saw sngi lai miet’ kan sdang naduh ka 11 tarik ban pynkut ha ka 14 tarik u Naitung 2022.
U President ka Seiñ Raij Jowai ma O.R. Challam haba ai jingkren sha ki lad pathai khubor mynta ka sngi ula ong ba ïa kane ka shad Behdieñkhlam haka 14 tarik la pynban ïa ka kum ka sngi shuti hapoh ka jylla bad ka jingpynkhreh kala sdang naduh u bnai Kyllalyngkot.
Hadien ka jingwan lyngshop jong ka khlam Covid-19 ha kine ki ar snem bala dep, mynta ka snem yn pynlong ïa ka shad Behdeiñkhlam khlem da don kano kano ka jingteh kyndon SOP jong ka sorkar, ong u ma Challam.
U kyrmen skhem ba ka Behdeiñkhlam mynta ka snem kan long kaba phuh ba phieng kaba long ruh shibynta na ka jingrakhe ïa ka jingdap 50 snem ka jylla bad ka jingïoh laitluid jong ka Ri India kaba 75 snem mynta.
Ula ïathuh ba Seiñ Raij Jowai mynta ka snem kala pynlong ïa kane ka Behdeiñkhlam ha ryngkat ka jingïatreilang bad ka North Eastern Council (NEC) Shillong, ka tnad Tourism, ka Planning, Art and Culture bad ka Jaiñtia Hills Autonomous District Council (JHADC).
Ka Sein Raij Jowai ka khot bad wer ïa baroh ki nongshong shnong ban wan sakhi ïa kane ka Behdeiñkhlam kaba khampher namar wat ïa ka Aitnar la pynbha pynmiat ïa ka lyngba ka tnad Tourism jong ka sorkar jylla bad kyrmen skhem ba yn sa lah ban plie noh ïa ka ha kane ka snem ban wan.
Ula ong ba ka jingpyndep ïa ka lehñiam Behdeinkhlam ka dei kawei na ki bynta ban beh ïa ka pang ka shitom, ka bamsap bampong, kan ïada na ka jingdih pynbuaid kum u Drug ïa ki khun samla kiba dei ki lawei, ka jingshah thombor jong ki kynthei khynnah bad kan wanrah syndon ïa ka bha ka miat, ka roi ka par ha ka ïing ka sem, ka shnong ka thaw bad ka ri hi baroh kawei.
Ha kane ka Behdeiñkhlam mynta ka snem yn wan sakhi lang da u Chief Justice ba don burom ka High Court, kymjuh u Myntri Rangbah ka jylla, u shongknor ka Jylla, ki MLA nalor kiwei de.
Ha kaba ïadei bad ki kam ñiam kam rukom kiba la pyndep da u Dolloi, ki 13 Wasan, u Langdoh, ka Langdoh, u Pator, ki Sangot ki Maji, u Dhulia, u Sutia bad ki Phrakur Phra kmai, na ka liang u ma Puramon Kynjing kum u Dolloi ula pynsngew kala dei ka por bad pali ba u Langdoh Jowai un pyndep ïaka Lehñiam Behdeiñkhlam.
‘Ka nongrim jong ka Behdieñkham ka long ban pyndep ïa ka shad ka kmen halor ki jingkyrkhu jong u nongbuh nongthaw lyngba ka mei mariang’ la ong u Dolloi bad kum ka jingburom ïa kine baroh kiba pyndap pynbiang ïa u khun bynriew kala dei ka por ka kmen ka risa da ka jingkyrmen kumjuh ïa kaba bha ha kane ka snem baroh shisnem.
Hashwa ka lehñiam Behdeiñkhlam la don ka lehñiam ‘Knia Khang’ ka Kñia Pyrthat jong ki saw Langdoh bad poi sa ka ‘Saw sngi lai miet’ kaba pynpaw ïa ka jingkmen ha ka mynsiem, ka jingïaieit, ka jingkitkhlieh ban ïada ïa ka mei mariang kaba long ka nongkyrshan ha baroh ki liang jong ka jingim, la pynkut u Dolloi.