Hadien 18 sngi ba jah rngai lap ïa ka metiap ka thei samla na wahrit Nongrah-Lapalang

Shillong, Iaiong 6 : Hadien 18 sngi ba jah rngai ka thei samla mynta ka Lah Sngi U Blei ha ka por janmiet ki Pulit ka nongbah Shillong ki la lap ïa ka metiap ba ka per ha ka wahrit kaba don ha khappud jongka shnong Nongrah bad Lapalang. Kane ka samla ka la jah naduh ka 20 tarik Lber mynta u snem.
Ki nongshong shnong ka thaiñ ki la ïohi nyngkong ïa kane ka metiap kaba la song ha ka byrni bad mar mar ki la pyntip sha ki bor shnong, kiba la pyntip pat sha ki Pulit ka Rynjah Police Station.
Ka kynhun ki Pulit ba kynthup ïa ki Crime Scene Unit, ki la poi sha katei ka wahrit bad ki la lum ïa ki sakhi satar hashuwa ban sei ïa ka met.
U Superintendent of Police ka East Khasi Hills Bah Vivek Syiem uba la leit hi da lade sha katei ka jaka, ula pynthikna ba kane ka metiap ka dei jong ka kong Eilang Phawa ba na Lawjynriew, Nongthymmai, kaba dei shnong trai na West Jaintia Hills.
Kat kum ka jingïathuh jong u, ki bahaïing kila pyntip ba kane ka kong ka la jah na ïing naduh ka 20 tarik Lber, 2026.ïa ka jingpyntip ba jah la rejister ha Rynjah Police Station bad la phah ruh ïa ki notice ban wad sha kiwei ki District bad ki Jylla, hynrei ym shym la ïoh satia ïa kano kano ka jingtip shano ba ka don.
Hynne, ïa ka met la lap ha ka byrni plastic ba la teh bad bret sha kane ka wah kaba don hapdeng ka Lapalang bad Rynjah” ula ong.
Ia ka met la kit noh sha North Eastern Hill Regional Institute of Health and Medical Sciences (NEIGRIHMS), bad yn leh ïa ka post mortem lashai ka sngi Ba-ar.
“Ngi la rejister ïa ka case bad ki Pulit kin trei shitom ban pynthikna ba ki nongleh bymman kin ngat ha ka aiñ. Ngi la ïoh katto katne ki sakhi halor ki briew ba donkti” ong u Bah Vivek.
U SP u la ïathuh ba ka met ka la kem pyut bad ïa ka daw ka jingiap yn sa pynthikna hadien ka post mortem.
“Hadien ba ngi la ïoh ïa ka kaiphod, ngin sa lah ban tip ïa kum kiei ki jingmong bad kumno kane ka kong ka shah pyniap. Ngin nang tohkit shuh shuh ban tip ïa ki daw bad kaei kaba lam sha kane ka kam bymman” ula ong.
La suba ruh ba la pyniap ïa ka sha kawei ka jaka bad ki nongpyniap ki sa thep ha byrni bad leit bret sha katei pat ka jaka.