Hadien 15 snem ba ïoh thep vote biang sha Meghalaya, dang bun pat ki bym pat rung kyrteng

Shillong, Nailar 01: La kumba 15 snem eiei ka shnong Mawiamsyiem ka Shnong kaba don sharum jong ka Langpih khappud jong ka Jylla Meghalaya bad Assam ki la shah weng na ka thup thep vote ne electoral roll jong ka Jylla Meghalaya hynrei hadien ka jingïakhun kaba jwat ha u snem 2020 la ioh ban pynrung biang ïa ki Nongshong Shnong jong kane ka Shnong hapoh ka electoral roll jong ka Jylla Meghalaya.
Pynban haduh mynta dang tang khyndiat ngut ki Nongshong Shnong kila ïohban rung kyrteng ha ki electorall roll. Halor kane na ka liang i Kong Icyful K. Musulman kawei na ki Nongshong Shnong ka Mawiamsyiem kaba long kawei napdeng ki Longkmie kaba ju mih shakhmat ban trei bad ban peit na bynta ka jingeh jong ki Paitbah ka thain khappud, ha ka 30 tarik u bnai ba ladep ka la ïoh ban ïakynduh biang sa shisien ïa ki katto katne  ngut ki paidbah nongshongshnong jong ka Shnong Mawiamsyiem,Mawblang,Umriang ban sngap ïa ka jingeh jong ki paidbah kane ka thain.
Ha kane ka sngi na ka liang ka Kong Icyful . Musulman ka la kyrpad ïa ka Sorkar ba ka dei ban phai khmat kyrpang halor ka jingeh ba ki paidbah ki ïakynduh naduh ka Roi ka par la shah iehnoh bein. Ka la kyrpad ia ka sorkar ba ka dei ban pynkloi noh ban pynrung kyrteng ia ki Nongshong Shnong jong kane ka thaiñ namar bun kim pat dep ban pynrung kyrteng,khnangba ki paidbah kin ïoh ka hok jong ki ban thep vote hapoh la lajong ka jylla.