Nongstoiñ, Naiwieng 30: Ka Balang Presbyterian Umyiap kaba dei ruh ka kmie jong ka District Umyiap kaba hap hapoh ka Laitkseh Presbytery, ka dei kawei na ki Balang kiba la rim bha kaba la sdang naduh u snem 1897, kata 42 snem hadien ba u (L) Larsingh Khongwir, u la wan ban ïalap ïa ka niam Khristan ha Madan Riewblei ha ka 27 tarik Naiwieng 1855.
Katkum ka history jong ka balang la ong ba ha kaba sdang eh ki la don kumba 16 tylli ki tnum ïing khristan, hynrei ka jingroi jong ki longïing Khristan ka suki bha, namar ka jingkynriah shnong sha kiwei pat ki kyntoit kum ha Nongspung, Lumpyngad, Mawïawet, Nongdom, Mawkynbat, Domwahlang bad kiwei kiwei ki jaka.
Nalorkata naduh ba la seng ïa ka Balang Presbyterian Umyiap, ka la pynkha haduh lai tylli ki balang kata ka Balang Presbyterian Mawïawet, ka balang Presbyterian Lumpyngad bad ka balang Presbyterian Domwahlang.
Katkum ka history jong ka balang la ong ba haduh mynta, ki don kumba 96 tylli ki ïing Khristan hapoh ka balang hynrei da ka jingïatylli bad ka jingïalong kawei jong ki longïing longsem baroh, ka balang ka la pdiang sngewbha ïa ka jingtyrwa jong ka Jingïaseng Samla KJP Synod Sepngi lyngba ka Laitkseh Presbytery, ban pynlong ïa ka Jingïaseng Samla KJP Synod ha katei ka balang ha u snem 2027.
Shuh shuh katkum ka history jong ka balang, la ong ba naduh ba la seng ïa katei ka balang ki la don kumba 13 ngut ki Pastor kiba sharai bad peit ïa ka balang. Hynrei san ngut na ki, ki la khlad noh bad kiba dang im haduh mynta ki don phra ngut bad ar ngut ki dei kiba dang trei hapoh ka Umyiap District bad kiba peit ïa ka Balang.
Nalor ki Pastor, ka history ka ong ba naduh ba la seng ïa ka balang, ki la don kumba 18 ngut ki Tymmenbasan, ha kaba khyndai ngut ki la khlad noh bad kiba dang im haduh mynta bad kiba dang ïai trei ïa ki kam hapoh ka balang ki don sa khyndai ngut.
Ha kaba ïadei bad ka jingpdiang ïa ka Jingïaseng Samla jong ka KJP Synod Sepngi ha u snem 2027, kaba dei ruh u snem ba ka balang kan jam ïa u mawmer ba shispah arphew khyndai snem, ki Nongsharai kata naduh ki Pastor, ki Tymmenbasan, ki Dkhot jong ka Committee balang ki riew dkhot jong ka balang ryngkat ki long ïing long sem baroh, ki la sdang shait shait ban pynkhreh na ka bynta ban pdiang ïa katei ka jingïaseng.
Ym lah ban len ba hapdeng jong kane ka por kaba hiran na ka jinghiar jong ka ïoh ka kot ka kamai kajih, ka bylla ka sngi hynrei baroh ki longïing hapoh ka balang, ki dem diap ha ki jingduwai da kaba shaniah skhem ha u Blei, ba un plie ki lad ki lynti ha kawei pa kawei ka longïing jong ka balang haba ka pdiang ïa katei ka jingïaseng.
Kum ka jingkyrshan bad ai mynsiem lem hapdeng jong kiba bun ki jingpynkhreh ban pdiang ïa katei ka jingïaseng, da ka jingsngewrit ka balang ka kyrpad ïa baroh ki para bangeit ba kin duwai lem na ka bynta jong ka balang haba ka pynkhreh ban pdiang ïa katei ka jingïaseng.
Nalorkata kum shi bynta jong ka jingpynkhreh ban pdiang ïa katei ka Jingïaseng Samla KJP Synod Sepngi, ka balang kan sdang ban pynmih fund da kaba pynlong ïa ka jingïalehkai phutbol ba shi sngi ha Madan Riewblei ha ka 6 tarik u bnai ban wan (Nohprah) hapdeng ka kynhun ïalehkai jong ki Pastor ka KJP Synod Sepngi pyrshah ïa ka kynhun ïalehkai jong ki Ophisar sorkar jong ka West Khasi Hills.
Nalor kata ha katei ka sngi kan sdang shuwa ka jingïalehkai hapdeng ka ki Tymmenbasan kiba dei na ki balang hapoh ka Umyiap District, pyrshah ïa ki nongkitkam jong ka Jingïaseng Samla Umyiap District. Nalorkata, kin don ruh kiwei pat ki jait jingïalehkai kiba itynnad bad ki ban pynshongshit ïa ki paitbah kiba wan peit kai.
