Hadien 122 snem thaw record ka Mawsynram bad ka sien balai ïa ka Sohra

Shillong, Jylliew 19 : Ka jingther u lapbah ba jur bha lai sngi lynter kata haduh ka nohphai sngi jongka Sngi Saitjain 18.6.2022 ha kane ka jylla Meghalaya bad kumjuh ruh ha kiwei kiwei ki jylla kane ka thaiñ ka la pynlong ïa ka Mawsynram ka jaka ba jur slap tam ha ka ri bad pyrthei ba kan ïoh bad thaw ïa ka record hapoh ki 24 kynta ki jingjur slap da kaba u lapbah u la poi sha ka 1003.6mm. Kane ka long hadien 122 snem ba ka Mawsynram ka sa ïoh ban bat ïa ka record ba thymmai. Kumjuh ruh ka Sohra ruh ka la thaw ïa ka record ba thymmai kaba u lapbah u la poi sha ka 972 mm hapoh ki 24 kynta tang kane ka long ka sien kaba lai ba ka Sohra ka la thaw record hadien 122 snem. Kane ka long kat kum ka jinglum jingkheiñ da ka India Meteorological Department (IMD).
Ka Mawsynram haduh mynta ka dang ïoh bat hi ïa ka nam kum ka jaka ba jur slap tam ha India bad ha pyrthei namar man la u snem ka jingther u lapbah ha katei ka thaiñ ka long beit 11802.4 mm ha ka shisnem. Ka Sohra ka poi 11359.4 mm ha ka shisnem ha ki snem 1971 haduh 2020.
Ka Sohra tang mynta u bnai ka la ïoh ïa u lapbah haduh 4081.3 mm. Tang hapdeng kine ki lai sngi pat kata kat haduh ka Sngi Thohdieng ka Sohra ka la ïoh slap haduh 2457.2 mm. Kane ka jingïoh slap ka Sohra haduh 2457.2 mm hapoh ki lai sngi ka dei palat ban ïa kaba ka Mumbai bad Delhi ki ïoh ha ki lai snem.