Hadien 10 snem kynthih ïohlad ban tih dewïong lyngba ka Scientific Mining ha East Jaiñtia Hills

Khliehriat, Nailar, 22: Hadien shi phew snem kynthih ka jingshah shitom, ki paidbah jong ka East Jaiñtia Hills District kiba ju im kamai ja kpoh da ka kam tih dewïong bad khaïi dewïong ki la pynpaw da ka durkhmat kaba dap da jingkyrmen bad jingkmen ba la ïohlad biang ban tih ïa u dewïong ha kaba yn sa pyntrei da ki kor ki bor katkum ka juk stad saïan naduh ba la khang ïa ka jingtih bad shalan dewïong da ka National Green Tribunal (NGT).
Ha ka jingpynsngew paidbah ba la pynlong da ka Meghalaya State Pollution Control Board (MSPCB) ha ka dong Saryngkham kaba hap hapoh ka shnong Byndihati ym shym la don mano mano ruh ban pyrshah ïa ka jingtih dewïong katkum ka juk stad saïan. La pynïaid ïa ka jingpynsngew paidbah da u Environmental Engineer jong ka MSPCB u Bah Y.F.Laloo ryngkat ka jingdonlang jong u Deputy Commissioner ka East Jaiñtia Hills District u Shivanh Awasthi, u Superintendent of Police jong ka East Jaiñtia Hills District u Giri Prasad, u Member Secretary jong ka MSPCB u Dr G.H.Chyrmang, u Environmental Engineer ka MSPCB Bah J.F.Lamurong bad kiwei kiwei.
Ïa ka jingpynsngew paidbah la pynlong ruh hajan ka par dewïong ba la long trai da u Bah Dapmaiñ Shylla na ka shnong Byndihati hi, uba la ïoh ïa ka laisen ban tih ïa u dewïong ha ka jaka kaba heh 148 hectares.
U Bah Dapmaiñ Shylla haba kren ha ka jingïalang u la ong, ‘nga dap da ka jingsngewkmen ba nga la ïoh ïa ka laisen bad nga pan ruh ïa ka jingïatreilang na phi ki paidbah ba kane ka kam dewïong kan ïaid beit ïaid ryntih bad kan wanrah jingmyntoi ïa baroh. Nga ai khublei ruh ïa baroh ki paidbah kiba la ai ka jingkyrshan ïa kane ka jingpynsngew paidbah kiba kyrshan tylli ïa kane ka jingïalang kaba la long kaba jop.”
U MLA barim jong ka Khliehriat Constituency u Bah Justine Dkhar, uba dei ruh u Adviser jong ka Jaiñtia Coal Miners and Dealers Association (JCMDA), u la ong ba ka jingtih dewïong katkum ka juk stad saïan kan ïada ïa ka jingshah pynjot jong ka mariang bad hadien ba ladep tih ruh kan don biang ka lad ban pynbha pat ïa ka mariang, kan ïada ruh ba ki nongtrei kin lait na kino kino ki jingma jingmynsaw bad kane kan wanrah ruh ïa ka lad ïohkam ïohjam ïa ki paidbah.
U la ong ruh, “ïa ka jingtih dewïong la khang da ka NGT naduh ka 17 tarik, Ïaiong, 2014 bad mynta ka la kynjoh sha ka shi phew snem kynthih hynrei mynta la ïohlad ban tih ïa u dewïong lyngba ka Scientific Mining.”
U la pynpaw ruh ka jingsngew kmen ba ka ïingbishar Supreme Court ka la shim ïa ka rai ba khatduh kaba la pynskhem ïa ka jinglong trai jong ki trai jaka ïa ka khyndew ka shyiap, ïa u maw bad ïa ki marpoh khyndew hynrei kaba donkam ka dei tang ka Mining Lease na ka Sorkar ban dup ïoh tih ïa u dewïong. U la ong ba ha ki por ba ladep ki paidbah ki dang ïoh hi ka lad malu mala ban pynïaid ïa u dewïong namarba dang don u dewïong lilam da ka Coal India Limited.
Ha kajuh ka por u la ai ka jingkhublei kyrpang ïa ki ar ngut ki rangbah na East Jaiñtia Hills District, u Bah Dapmaiñ Shylla bad u Bah Nehlang Lyngdoh kiba la lamkhmat ban aplai ïa ka Mining Lease na ka Sorkar ha kaba la khmihlynti ba kin sa nang don shuh shuh ki ban ïoh ïa ka Mining Lease ban ïoh tih ïa u dewïong.
U President jong ka Jaiñtia National Council (JNC) u Bah Sambormi Lyngdoh uba la ai ka jingkyrshan ïa kane ka jingtih dewïong ha kane ka jingpynsngew paidbah u la ong, “kumba na ka por sha ka por ngi la ieng na ka bynta ka dawbah dawsan jong ka ri bad ka jaitbynriew khamtam na ka bynta ka ri lum Jaiñtia, kumta ha kane ka kynti ruh ngi ïengskhem ban ai ka jingkyrshan bapura ïa kane ka jingpynsngew paidbah. Ha u snem 2014 ha ka por ba ka NGT ka la khang ban tih ïa u dewïong ka la don ka jingïakhih kaba jur bha hapoh ka district ha kaba ka la wanrah ïa ka jingduh noh ïa ki ar ngut ki mynsiem ba kordor hynrei mynta ngi sngewkmen ba hadien shiphew snem u Blei u la sngap ïa ki jingdwai jong ngi bad uba la ïohi ïa ki jingeh jingjynjar jong ngi bad lyngba kane ka Sarangkham Coal Mine Project la ïohlad biang ban trei dewïong kaba lyngba ka Scientific Mining.”
U la kyntu ruh ïa ki trai jong ki par dewïong ba ki dei ban bud ryntih ïa ki kyndon ïada mariang bad kiwei kiwei ki kyndon khnang ba kane ka kam trei dewïong kan long kaba ïaid beit ïaid ryntih nangne shakhmat.
U Bah Naser Pala, na shnong Byndihati, u la ong ba kane ka jingtih dewïong katkum ka Scientific Mining kam ym kath ïa ka mariang, ïa ka umbam umdih bad kan long ruh ka lad ïohkam ïoh jam jong ki paidbah baroh naduh kiba heh haduh ki barit baria bad kan kyntiew ruh ïa ka ïoh ka kot jong ki paidbah.
Ha kane ka jingïalang la ai jingkren da u General Secretary ka JCMDA, u Bah Shanbor Lamare, u Waheh Shnong ka Ladrymbai Dongwah u Bah Deibor Suchiang, u Waheh Shnong ka Deiñshynrum Bah Willbert Nongtdu, u President jong ka East Jaiñtia Coke Association Bah Delwir Swer, u President All Jaiñtia Youth Welfare Organisation Bah Heartermon Ryngkhlem, ka Kong Richa Shadap na ka shnong Narwan, u Waheh Shnong ka Khliehriat East Bah Kedios Rymbai, u Waheh Shnong Wapung Skur Bah Postling Dkhar, Waheh Shnong jong ka Byndihati u Bah Hambertus Nongtdu bad kiwei kiwei.