Haba thung dieng ngi dei ban sumar, pynheh pynsan bad ïada ïa ki: Staising Kharbteng

Lyngïong/Mawkyrwat, Jylliew 07: Ka Seventh Day Adventist English Secondary School (SDAESS), Lyngïong ha ka 6 tarik u Jylliew, 2022 ka la rakhe ïa ka sngi pynneh pynsah mariang ne ka World Environment Day kaba dei halor ka phang, “Tang kawei ka Pyrthei”, ha kaba u bah Staising Kharbteng u la long kum u kongsan.
U bah Staising Kharbteng uba dei ruh u khynnah skul barim katei ka shlem ai jinghikai ha ka jingkren jong u kum u kongsan u la pynpaw ba ka jingrakhe pynneh mariang ka dei ban don ka nongrim ba skhem ba baroh ki nongshong shnong kin sngewthuh ba balei la rakhe ïa kum kane ka sngi khnang ba kan long kaba seisoh. U ruh ong lada kiba bun kim sngewthuh ïa ka tynrai jong ka jingrakhe pynneh mariang bad thung dieng, ki jingpyrshang jong baroh ki kynhun ban ïada mariang naduh ki bor sorkar, ki jaka pule, ki sengtrei monsngewbha kin shu long lehnohei.
U la pynpaw ba ki dei ban sngewthuh ba ka jingpom pathar bad pynjot ïa ki khlaw ki btap, ki dieng ki siej, ka jingbret pathar ne pyntuid ïa ki jaboh bad ki plastik sha ki lum ki wah ki buh jingeh ïa ki hi ki khun bynriew ha bun ki liang kum ka jingïoh ïa ka lyer oxygen ba khuid ban ring mynsiem, ïa ka bam ba kin bam, ïa ka jingsboh ka khyndew na bynta ka jingheh jingsan ba tikna ki jingthung jingtep bad ki dieng ki siej, ka jingïaid beit ïaid ryntih ka suiñbneng bad ter ter. “Ka long kaba donkam ban sngewthuh ba haba ngi thung dieng, ngi dei ban sumar, pynheh pynsan bad ïada ïa ki bad kum ka jaidbynriew ban bud ïa ki matti ki longshwa kiba la ïohi lypa ïa ka jingkordor ban ñiewkor ïa ka mariang lyngba ki ‘law kyntang, ki ‘law khang kum ka nuksa”, ong u bah Staising.
Ha kane ka sngi la ïoh ïa ka jingïalang ban pynshai ïa ka jingkordor ban ñiewkor ïa ka mariang ba la pynïaid da u babu D. Shadap, ka jingkren na u bah Kliphi Kharbteng bad u bah A. Shylla, Headmaster ka Seventh Day Adventist English Secondary School, Lyngïong.
Ha kane ka sngi ki khynnah skul ki la ïashimbynta ruh ha ki jingïakob dro jingdro, thoh esse, jingkren muk-mak, jingïalehkai skit ban pyn-i ïa ka jingdonkam ban ïada ïa ki dieng na ka jingpom pathar. Hadien kata, la sam ïa ki khusnam sha ki nongjop ha kitei ki jingïakob da u kongsan bad kiwei kiwei.
Hadien ka jingïalang la ïoh ban thung ïa ki tynrai dieng bad ïa ki jingrwai bad jingtem pynshit rhem na u samla E. Mawkhiew uba dei u khynnah skul barim ha ryngkat ki paralok jong u.