Haba poi sha ka jingïada ïa ka jaitbynriew, kloi ki MLA, MDC ka Garo Hills ban treilang, buh shadien ïa ka party

By Mawphor Editor On Apr 6, 2026

K i lah ban don bun ki bym mutdur lane kiba kyndit pynban, haba ki ïohi, ba U Mukul Sangma, u ïatreilang bad U Conrad Sangma, ha Garo District Council bad katei ka dei ka jingjia kaba kiba bun ki dei ban sngew lyngngoh bad kam kut tang ka jingïatreilang, ha kaba kyrshan ïa ki poiwir, ba kim dei ban ïoh thep vote ha katei ka District Council lane ka jingpynbun ha ka ïing dorbar jong katei ka Council, hynrei kaba kham jylliew shuh shuh, ka long ba kumno ki MDC jong U Mukul Sangma, ki donlang ruh ha ka Executive Committee, kaba la khlieh da ka NPP?
Kam dei tang kata, hynrei lyngba ka jingïashim bynta lang jong U Mukul Sangma, la ïohi, ba U Conrad Sangma, ula lah ban kyndang noh ïa U Bernard Marak (uba dei ruh u nongshun politik ba hakhmat duh jong U Conrad) jong ka seng BJP, na ka EC thymmai jong ka NPP.
Lada kane ka jingïatreilang ha kane ka sien, ka don ïa ka jingmut kaba jylliew, kata ka paw shai, ba kine ki arngut ki nongïalam, ki la dep ïa saiñ ïa sdieh bha bad kata ka long, ba ka thong kaba hakhmat duh jong ki, ka long ban pyntroiñ ïa ka seng BJP ha Garo Hills bad sa kawei pat ka long, ban khanglad ïa ka jingbeh jur ka lyer jong u prah ha ka elekshon 2028 bad lada kine ki arngut ki don ïa katei ka thong, kumta kan long kaba jwat ïa kano kano ka seng saiñ pyrthei lane wat ïa ka Congress, ba kin khynra ïa ka Garo hills.
Ki dak ki shin, kin sa nang paw shai, ha kane ka elekshon MDC 2026 lane 2027 bad lada ka TMC bad ka NPP, kin ïatreilang kumta, ka dak kaba shai ka kdew, ba ka jingthmu ka long ban pynduh jait ïa ka bor jong ka BJP bad ka bor jong ka VPP, ha ka elekshon MLA ka ban sa wan bad lada kan wan ha katei ka jingkheiñ, ki lah ruh ban nang pynjlan ïa ka elekshon MDC, na ka bynta ban kham pynsuk ïa ka trei ka ktah bad ka leit ka wan, na bynta u 2028.
Ka jingïatreilang jong U Mukul Sangma bad U Conrad Sangma, lada ka long ha kano ma kano ka por, kan pyni, ba ka jingkheiñ jong ki na Garo Hills, kan nym duna ïa ka 18 ngut ki MDC lane 15 ngut ki MLA, ba kin pynjop bad ha katei ka jingkheiñ, kam long kaba eh, ba kin pynkhreh lypa ïa ka EC lane ïa ka jingsynshar ha ka jylla, namar ba na Khasi bad Jaiñtia hills, kin ïoh da kaba suk kumba 5 haduh 10 ngut ki MLA bad ha katei ka phormula, kumta ka pyni ba ka jingthmu kaba jngai, na ka bynta ki aiñ ki kanun, ka roi ka par bad ka ïoh ka kot, ha kaba kin durïap bha sha Garo Hills.
Lah ruh ban ong ba kane ka jingshem phang jong ki Garo ym lah satia ban ïalehkai lada poi sha ka jinglong kyrpang jong ka jaitbynriew jong ki watla ki don ha kano kano ka seng saiñ pyrthei ne la ka jong ka jong ka ïing kin ym lah satia ban ïapeiñ ne ban shet kylla ïa la ka jong ka jaitbynriew.
Kane ka pyni shisha ïa ka jinglong ba kyrpang jong ka jaitbynriew Garo ym kumba ong da mano re mano ba kidei ka jaitbynriew kaba khyllah.
Tang ban ïoh synshar hi da la ki jong ki paradoh parasnam ne ki jait ki khong la jong ki kloi ban buh sha kyndong ne sharud ïa la ka jingsngew party ne ïapher uniform kaba kiwei pat ki jaitbynriew hapoh ka rilum Khasi Jaiñtia ki dang duna bha ban pei phang khamtam eh haba poi ka por elekshon kim kwah satia ban ailad beit tang kawei ka seng riewlum ne ban ïatreilang ban don ha liang synshar ne ban don ha ka liang ïatei ne ban pyrshah ïa ki jingleh beaiñ jong ka sorkar ne party kaba don hapoh ka liang synshar, hynrei kumba la ïohi pat ba jan baroh ki party hapoh Khasi Jaiñtia ne ki MLA ba la jied ki paidbah ki kloi ban shet kylla ïa ka jaitbynriew tang na ka daw ka party ne tang na ka daw ba kwah shuki bad haba la ïoh shong shuki pat kim lah ban trei bha ïa ki kam, bad la ïohi ba manla ki tnat ba bat minister ki MLA Khasi kin long beit ki tnat ba wanrah jingeh ïa ki paidbah bad nongshong shnong ka jylla, bad ïa kane ki paidbah kin hap khmih dalade kum kiei kita ki tnat Sorkar ba bat bad khmih da ki minister Khasi.