Sohra, Risaw 23 : Ka ophis jong u District Transport Officer (DTO), East Khasi Hills ha ryngkat ka jingiatrei lang bad ki bor distrik kumjuh bad ka tnad Pulit ki la pynlong ïa ka jingai jingpynshai kumno ban wanrah ka jingshgain ha ka leit ka wan ha surok (Road Safety: Life Protection) ha ka jingïalang kaba la pynlong ha Maraikaphon Hall, Sohra.
Ha kane ka prokram la wan ban donlang naduh ka Kong AR Kynta, BDO Shella Bhologanj, nangta Bah R Hinge ba dei u District Transport Officer, Bah MB Roin Asst. Executive Engineer PWD (Roads) Sohra, ki nongniah jong ki taksi kamai bad sumo kamai na ki association bapher bapher nalor ki heh sorkar.
Ka Kong AR Kynta haba kren ha ka jingïalang ka la kyntu ïa ki nongnïah kali ba kin long kiba don burom don akor haba ki niah kali. Ka la ong ruh ba ki nongniah kali ki dei ban kynmaw ba ka Sohra kadei ka jaka kaba pawnam na ka bynta ka jingdon burom ïa kaba tip satlak kum ka Akor Sohra.
Nangta ka la pynshai ruh ha ki shaphang ki kyndon jong ka Motor Vehicles Act, 2009, kaba ïadei bad ka bai luksan kaba dei ban ïoh na ka jingshah tynrah kali ne kata ka hit-and-run compensation bad pynshai ruh halor kiwei kiwei ki bynta ba kongsan kiba ju tip kum kata ka kynta kaba kordor tam ne ka Golden Hour ban ai jingïarap kaba kyrkieh na ka bynta kito kiba tyngkhuh ha ki jingjia aksiden.
U DTO pat u la ong ba ka thong jong kane ka prokram ka long ban pynduna ïa ka jingbun ki aksiden bad ruh ban pynsngewthuh ïa ki paidbah ba kin don ka jingkitkhlieh haba ki niah kali ha ki surok paidbah.
Ka prokram kaba bniah ha kane ka sngi kadei halor ka jingai jinghikai kaba la aid a u Motor Vehicle Inspector Bah L Nongrum uba la batai bniah ïa kiba bun ki mat kiba ïadei bad ka road safety, kynthup ïa ka jingpynher palat ïa ki kali, ka jingdonkam ban deng seat belt bad helmet, ka jingkiar ban dih buaid haba niah kali, pyndonkam mobile por niah kali, ka jingsumar bha ïa ka kali, ka jingpynbiang ïa ki kot ki sla ba donkam, ban kiar kit palat pud bad kiwei kiwei.
