Haba nga leit jingleit nga smat ban rah lang ki kot Bakhuid ban pule ha ki lynti ïaid: Bah Sanbor

Shillong Nohprah 14: “Ha ka jingïaid lynti kum u nongmihkhmat haba leit jingleit kylleng kylleng ne shabar jylla nga jus mat ban rah lang ïa ka Bible ne kano kano ka kot ba khuid jong kano kano ka kynhun niam ban pule namar haba nga shong ha liengsuin nga sngewtynnad ban pule ia jan baroh ki kot bakhuid bad nga shem ba ia ka jingim jong baroh ki kynhun bynriew la thaw hi da u Blei nongpynim bad kam pher la ngi dei na kino kino ki kynhun niam hynrei haba khatduh la thaw hi ia ngi baroh ki khun bynriew da u Blei,” ong u MLA ka 19th South Shillong Constituency uba long ruh u Myntri Sorkar jylla u Bah Sanbor Shullai.
Ia kane u la ong ha ka jingrakhe advance Christmas bad snem thymmai hapoh State Convention Centre ha ka sngi saitjain. Ia kane ka jingrakhe lehkmen Khristmas bad snem thymmai la ialam da u MLA ha ryngkat ka jingïatreilang bad ka Monitoring Implementation Committee jong ka 19th South Shillong konstituensi.
Ha kane ka sngi ba rakhe ïa ka jinglehkmen advance Khristmas la wan ban ïa snohkti lang da ki kynhun Balang Khristan bapher bapher kiba hab hapoh ka South Shillong konstituensi, ki Dorbar Shnong bad ki paidbah kiba la shah khot sngewbha sha kane ka jingrakhe lehkmen Khristmas.
U MLA ka South Shillong u Bah Sanbor Shullai u la sam jingïarap ruh sha ki kynhun balang bapher bapher bad kumjuh sha ki Dorbar Shnong kiba hab ha South Shillong konstituensi.
U Bah Sanbor Shullai u la ot ruh ïa u cake kum ka dak jong ka jingrakhe ïa ka jinglehkmen Khristmas, bad ha kane ka sngi ka la don ruh ki jingduwai, ki jingrwai, ki jingtem jingput ba la pynkhreh da ki nongtem nongput jong ka Cathedral Band jong ka Parish Mary Helps of Christian Laitumkhrah bad ki nongrwai bad kumjuh ruh ka jingai sngewbha khristmas da u MLA ka South Shillong sha baroh kiba la wan sha kane ka prokram.
Kum u MLA u Bah Sanbor Shullai haba kren ha kane ka sngi u la ong ba kum ka komiti ka shait pynlong ïa ka jinglehkmen advance Khristmas man la u snem bad mynta u snem ruh ka komiti ka la pynlong ïa jinglehkmen advance Khristmas bad advance snem thymmai kaba long ruh kum ka dak ka jingkyrmen ba kan long ka khrismas kaba dap ba kmen bad u snem thymmai u ban wan un long u snem ba pahuh pahai bad u ba dap tang da ki jingkyrkhu.
Ha kane ka sngi la ïoh ka jingkren na u Rev Fr. Richard Majaw Parish Priest ka St. John Parish Laban uba la ong ba u Krist u la wan sha kane ka pyrthei ban pynim ïa ki khun bynriew. Na ka liang u Fr Majaw u la pynpaw ka jingai khublei ïa u Bah Sanbor Shullai naba na ka liang jong u, u la ong ba kan dei ka sien kaba nyngkong ban ïoh ban ïashim bynta ha kane ka jait prokram. Ha kane ka sngi la ïoh ruh ka jingkren na ka liang u nongïalam niam ka Himanshu Christian bad kumjuh ruh kiwei kiwei pat ki prokram.