Haba kren ïa ki jingeh ki paidbah ïoh por ka VPP tang khyndiat kynta, ong u Bah Ardent

Shillong, Nailur 14: Ka seng saiñ pyrthei kaba don ha ka liang pyrshah ka Voice of the People Party (VPP) ha ka sngi Thohdieng ka la pynrem jur ïa ki nongthaw aiñ bad kumjuh ruh ki paralok kiba donlang hapoh ka sorkar kaba la synshar ïa ka jylla da kaba kynnoh ba ki la shim noh ïa ka jaka jong ki MLA ka liang pyrshah kiba wanrah ïa ki mat kiba ktah ïa ki paidbah ha kane ka dorbar Synrai kaba dang shu dep.
U Nongïalam ka VPP bad u MLA ka Nongkrem u Bah Ardent Miller Basaïawmoit u la ong ba kane kadei ka daw ba ka party ban shong kyllaiñ myngor kum ka dak ka jingpyrshah ha kaba ïadei bad ka jingkiew dor ki marbam mardih kaba la ktah ïa kiba duk kiba raitoi.
Haba kren sha ki lad pathai khubor ha madan Malki u Bah Basaïawmoit u la ong, “Ka ïing dorbar kadei ka rynsan ha kaba ki MLA jong ka liang pyrshah ki dei ban ïoh ka por kaba biang ban ïasyllok ïa kiba bun ki mat kiba ktah ïa ki nongshong shnong jong ka jylla hynrei sngewsih, kaei kaba la sakhi ha ki snem ba la dep ba ïa kane ka jaka la shah knieh noh ha ki MLA kiba don ha ka liang synshar,” ong u Bah Ardent.
“Baroh ki MLA na ka liang synshar kiba ïaroh ïa ka sorkar ki la mih shakhmat ban pynpaw ïa la ki jong ki mat bad ki jingeh. Nga sngew haba ki don bynta bad ka sorkar ki la dei ban shu kynduh ïa ki Myntri ne ïa u Myntri Rangbah ka jylla bad kaei kaba donkam ïa ki ban wanrah ïa ki mat jingeh hapoh ïing Dorbar thaw aiñ,” u la bynrap.
“Shuh shuh ngi la kular ïa ki paidbah jong ka jylla ba ngin pyrshah lada ka por ka donkam namar kata ngi wan mynta ban pynlong ïa ka jingshong kyllaiñ myngor ha kaba ïadei bad ka jingkiew dor ki marbam mardih kaba la ktah shibun ïa ki paidbah,” u la ong.
U la ong ruh ba na ka daw jong ka jingbym don ka rel ka lah ban long ka jingeh ha kaba ïadei bad ka jingkiew ki marbam mardih.
“Lada ka sorkar ka ong ba dei na ka jingbym don ka rel ba sa kiew dor ki marbam ha ka jylla ka la dei ban pyni ïa ki jingkheiñ haba nujor bad ki dor ki mur ha kiwei pat ki jylla. Ngi na ka VPP ki la dep ban ïa nujor bad ka jylla Mizoram. Ngi shem ba ki tiar ba kongsasn ki kham tad ha Mizoram, Dimapur, Assam,” u la ong.
Haba pynpaw ïa ka jingsngewkhia ïa ka jingdon bun ki khyrdop lum khajna ha shilynter jong ka jylla bad ki surok bah u nongïalam ka VPP u la ong, “Ka doh masi ha Dimapur ka long T 300 bad hangne ka la long arshah kata T. 500 ne T 600. Lada phi peit ïa ka jingkiew ka dor doh masi, ngin ym lah ban kyntait ba ka don ka jingduna ha ka masi. Namar kata ngi kwah ba ka sorkar ka dei ban wad ïa ki lad ki lynti ha kaba ïadei bad kane ka jingkiew ki marbam ha ka jylla,” u la bynrap.
Sa kawei pat u la ong ba ka saiñ pyrthei jong ka VPP kam dei tang ban ïakhun ïa ki elekshon shi sien ha ka san snem, hynrei ka saiñ pyrthei jong ka VPP ka dei ban peit ïa ki jingeh ba la mad da ki paidbah ka jylla.