Haba don ha ki jaka pule dei ban pynmlien ban ïa kren da ka ktien Phareng: Renikton

Mawkyrwat, Jylliew, 15: U Nongmihkhmat jong ka Mawkyrwat Constituency uba dei ruh kum u Myntri ka tnad umbah umdih jong ka Jylla Meghalaya, bah Renikton Lyngdoh Tongkhar, u la ong, “ban long kiba pnah ne kiew ha ka ktien ha thylliej da ka ktien nongwei ne ktien phareng ki dei ban pynmlien ban ïa kren haba ki dang don ha ki jaka pule la ka long para ba ïa pule lang ne bad ki nonghikai ruh”.
Ïa kane ka jingong u la pynpaw haba ai kren ha ki lad pathai khubor ha ophis treikam jong u ha Mawkyrwat namar ïa ka ktien la jong ne ktien khasi la ju ïai pyndonkam naduh dang rit bad kim klet noh ïa ka hynrei ki dei ban burom ïa ka bad khnang ba kin long ki samla ki ban kiew ha ka ktien ka thylliej ne ka thoh ka pule bad ba kin lah ban ïa nujor bad kiwei pat samla pule na kiwei ki distrik hapoh ka jylla Meghalaya ne shabar ka jylla.
Haba kren ha ka liang ka ka pule puthi, u bah Renik u la ong ba kum ki khynnah skul bad ki samla pule ha ki kolej ryngkat bad ki nonghikai ki dei ban don ka jingkitkhlieh da lade ïa lade bad kaba kongsan ka long kum ki nonghikai bad ki khynnah ne ki samla pule ki dei ban pyndonkam da ka ktien phareng ha baroh ki jaka pule khamtam hapoh ki kolej kim dei ban duna ha ka rukom ïa kren da ka ktien nongwei khnang ba kin lah ban ïa nujor bad kiwei de ki distrik kum ha nongbah Shillong.
U la ong, “Ka jinglah jong ki ban leh ïa kata ka bynta ka long lyngba ka jingïatreilang naduh ki nonghikai bad ki samla pule”, bad da kaba leh kumne kan pynkiew ym tang ïa ki hynrei ki lah ruh ban ïa nujor bad kiwei de khnang ba kin lah ban ïohi ïa ki kolej napoh South West Khasi Hills District ba kin pynmih ïa ki samla kiba ïoh ïa ka nam ha ka Top 10 bad Top 20 ha ki egsam bapher bapher la ka long ha ka SSLC bad HSSLC.
Ha kajuh ka por u la pynshai ruh ba ym ba ki jaka pule napoh jong ka South West Khasi Hills District ki duna ki samla kiba ïoh ha ki kyrdan ba ha khlieh ne pass bha ha ki result egsam hynrei kiba bun ki khynnah ne ki samla pule kiba paw bad kiba stad ki leit pule noh sha ki kolej kiba bit hapoh ka jylla kum ha Shillong ne ha kiwei pat ki jylla. Namarkata, u la kyntu ïa ki jaka pule hapoh ka South West Khasi Hills District bad kumjuh ruh ïa ki kmie ki kpa bad ki samla pule ba ki dei ban shim lang ïa ka jingkitkhlieh khnang ba kin rah ïa ka dong ka thaiñ bad pynmih ïa ki khynnah kiba bit ba biang ha ka jingshong skul hapoh ka distrik kum hapoh ka Sngap Syiem College bad lyngba jong ki la khmih lynti ba kane ka jaka pule kan sa long kawei na ki ba paw ha kine ki snem ki ban sa wan.
Ha kaba ïa dei bad ka jingithuh noh ïa ka Sngap Syiem College, Mawkyrwat kum ka People College, na ka liang u bah Renikton u la pynpaw ba u don ka jingkhmieh lynti ba lyngba ka jingleit ïa kynduh jong u ha ryngkat bad ki nongkitkam ka Sngap Syiem College ïa u Conrad K. Sangma u Myntri rangbah ka jylla ha kine ki taïew kan sa urlong kumba la ïa kren.