Mawkyrwat, Jylliew 04: Ki briew bym lah ban tip ne lah ban ong ki briew kiba shu dumon ki la leit ban bret ïa kawei ka met ïap jong ka sniang ha Wah Rilang kaba hap hapoh ka jingpeit jong ka shnong Mawranglang, South West Khasi Hills District.
Katkum ka tyllong khubor na u bah C. Kharsyiemlieh, Myntri jong ka shnong Mawranglang u la ong ba ïa katei ka met ïap jong u sniang la lap da ki nongshong shnong ha ka 3 tarik jong u Jylliew, 2023. Kumta na ka liang ki rangbah jong ka shnong ki la leit ban tam noh ïa katei ka met ïap bad ki la tep noh hapoh khyndew khnang ba kan nym ktah ne wanrah ka jingsma iwtung ïa ki nongïaid nongïeng.
Namarkata, u Myntri shnong jong ka Mawranglang u la maham jur ba nangne shakhmat lada lap ïa kino kino ki briew kiba wan leh khlem akor bad kiba leit bret ïa ki met ïap jong kino kino ki jait mrad hapoh um kum ka shnong kan sa pynshitom da kaba tyngeh. Ha kawei pat ka liang la maham ruh ïa ki briew ba kim dei ban wan pynlong kum ka jaka bret jakhlia ne ki met ïap ha katei ka wah Rilang bad ym tang ïa ki met ïap jong ki mrad hynrei la lap ruh ba shibun bah ki bilor kyiad ki plastik ba ki briew ki bym kheiñ snep ïa ka jingkhuid ka mariang ki la bret ha shi lynter ha katei ka surok bad la lap ïa kita ki jakhlia ha shwa ban poi ha jingkieng jong ka wah Rilang, ïathuh u Myntri Shnong.
Kumta, na ka liang ka shnong lyngba kane ka kyrwoh khubor ka maham jur ba la da lap ïa kino kino ki briew kiba ïaleh pyrshah hadien kane ka jingmaham kum ka shnong sa wad ïa ka sa bud ban pynshitom katkum ka aiñ shnong.
