Nongstoiñ, Nailar, 10: Ka FKJGP Rimuliang Circle ka la leit ban ai jingthoh ha u DC Nongstoiñ, ba ka pyrshah jur ïa ka jingthmu jong ka Sorkar Assam, ban thaw ktem pulit thymmai hapoh ka Shnong Langpih Nongmynsaw Syiemship, kaba long kawei na ki jaka ba dang don hapoh ka jingïakren pynbeit ïa u pud u sam.
“Ngi na ka seng ngi la ïoh jingtip na ki paidbah nongshong shnong, ba ki briew sorkar jong ka Assam ki la wan jurip ïa kawei ka jaka ha ka shnong Langpih Nongmynsaw Syiemship kaba ju tip kum ka Umsynrieh, kaba don hapoh Umsohram Langpih kaba dei ka jaka shimet jong u bah Bines Syiem Nongbah”, ong u President Bah Russfulson Wanniang.
“Kane ka jingleh jong ka Assam ka ïai pyni ba kam burom satia ïa ka status quo hapdeng ki ar Jylla. Ka kwah ban ïai leh donbor halor ki jaka ki puta jong ki paidbah nongshong shnong ka thaiñ Langpih baroh kawei”.
“Ka seng ka dawa ba ka Sorkar Meghalaya kam dei shuh ban shu ïai shah jem khlem nongrim ïa ka jingleh beaiñ jong ki briew na ka liang ka Assam, kum ba la jia na ka por sha ka por ki jingïai leh thom bor, kiba kum ki paidbah ngim lah shuh ban shah”.
“Ngi pyrshah jur ïa kane ka jingthmu leh don bor da ka Assam ïa ki briew jong ngi ha man la ki por. Kumta ngi dawa jur ba ka Sorkar Meghalaya kam dei shuh ban shu peitkai, hynrei ka dei ban pyni noh ïa la ka jong ka bor”, ong u Bah Russfulson.
