Mawkyrwat, ‘Nailur, 01: Uwei u khynnah samla u ba dang ha ki karta 15 snem ei hynnin ka janmiet jong ka 31 tarik u ‘Nailar, 2022 u la shim noh ïa la ka jong ka jingim da kaba sdien ïa lade ha u tyllai phasi ha kawei ka shnong ha South West Khasi West Khasi Hills District kaba hap hapoh jong ka Mawkyrwat Police Station.
Katkum ka tyllong khubor ba la ïoh lum lyngba ki bor pulit, la ong ba kane ka jingjia ka la jia ha ka miet jong ka 31 tarik u ‘Nailar, 2022. Shwa kata, la ïathuh ba une u khynnah samla ynda u la wan phai na skul bad u la jah na ïing naduh ka por 4 ne 5 baje ei ei bad ha kata ka jingjah jong u na ka liang kiba ha ïing ha sem ki la pynlong ka jingleit wad bad dei tat ha ka por shiteng synïa jong kajuh hi ka sngi la lap ïa ka met jong u ba u la sdien ha u tyllai phasi ha kawei ka jaka jong kawei ka shnong. “Na ka met jong u la lap ruh ïa kawei ka shithi ne ka Suicide Note”, ong ki bor pulit.
Shuh shuh la ïathuh ruh ba une u khynnah samla u ba dang pule ha ka klas IX hapoh jong ka Nativity Higher Secondary School, Mawkyrwat. Halor ka jingïap jong u, kiba ha ïing ha sem ruh kim shym la suba sniew ïano ïano ruh.
Ha kaba ïa dei bad ka Postmortem na ka liang ki bahaïing hasem ki la kyrpad ban pyllait bad ïa ka met jong u la aiti noh ha ki bahaïing ba kin pyndep ïa ka niam ka rukom.
