Ha u Rymphang yn ïa kynduh khatduh ka Sorkar ïa ka HPC

Shillong, Kyllalyngkot 21 : Ka sorkar kan ïa kynduh khatduh eh ïa ka Harijan Panchayat Committee (HPC) ha ka taiew ba nyngkong jong u bnai Rymphang 2024 na ka bynta ban shim rai khatduh halor ka jingpynkhreh ban pynkynriah noh ïa ki 342 tylli ki longïing na Them Metor ha Them ïew Mawlong.
“ Ngin ïa pynbeit khatduh ïa kane ka kam bad ka HPC namar ka la shu ïai sahteng mynta la hynriew snem namar hadien ba la dep ïa beit bad sngewthuh yn sa ïa soi ia ki kot ki sla ba donkam na ka bynta ban pynkynriah ïa ki sha ka jaka ba la pynkhreh kata ha ki quarter ka Shillong Municipal Board kaba la buh ruh shipor ïa ka ophis jongka Board” ong u Symbud Myntri Rangbah u Ma Sniawbhalang Dhar.
U la ïathuh ba ym shym la lah ban pynlong ïa ka jingïalang ha ka taiew ba ar jong une u bnai Kyllalyngkot kumba la ïakut mynshwa namar ka jingbunkam palat jongka sorkar naduh ka jingpynkhreh ïa ka Meghalaya Games, ka Meghalaya Day bad mynta sa ka Republic Day. Nalor kane sa ka jingwan plie ka President ka Ri ka Droupadi Murmu ïa ka Meghalaya Games bad bud pat sa ka jingwan u Myntri Kam Pohïing ka ri u Amit Shah ban pynïaid ïa ka jingialang jongka North Eastern Council (NEC) hangne ha nongbah Shillong.
U ma Sniawbha u la dep pynpaw kham mynshwa ba lada long kumno kumno ruh ïa ki Harijan yn hap pynkynriah noh beit na Them ïew Mawlong namar ym tang ba ka wanrah ka jingkhapngiah ïa ka sor, hynrei kam long khiah krat ruh ïa ki khynnah khyllung ban san ha kane ka jaka ba mynta nalor kata ka sorkar ka la donkam ruh ia kane ka jaka ban tei ïa ki jaka pynïeng kali, ki jaka shongïew ïa kiba die madan bad second hand bad ter ter.
Lah ruh ban pynkynmaw ba ka HPC ruh ka la pynpaw ka jingsngewhun ïa ka blueprint ba thymmai ba la pynkhreh da ka sorkar.
Ha kaba nyngkong ka sorkar ka la rai ban pynkynriah ïa ki 342 ki long ïing na Them ïew Mawlong sha ka jaka ba la don lypa kaba heh 2.14 acres hynrei namar ka jingkyrpad ka HPC ka sorkar ka la rai ban ai ïa ki sa 1.4 Acre khnang ba kin kham kylluid ban shong ban sah tangba dei pat ban kynmaw ba kine ki shu sah ha kane ka jaka ka jinglong trai kin ym ïoh namar ka jaka kan dei beit jongka sorkar.
Ka daw ba ka sorkar ka rai ban ïakynduh sa shisien ka dei namar u Secretary ka HPC u Gurjit Singh u la pan por ba un ïamir jingmut bad ki nongshong shnong ha Them ïew Mawlong shwa ban ïa kynduh biang bad ka sorkar ha ka sien kaba khatduh ban ïashim ïa ka rai da ka jingïamynjur lang.