Shillong, Jymmang 26: Ka Ri-Bhoi Watersports and Tourism Cooperative Society Ltd lyngba ka jingkyrshan ka tnad Tourism kan sa pynlong ïa ka jinggakop kieng lieng kaba la tip kum ka Megha Kayak Festival 2022 kaban sdang naduh ka 13 tarik haduh ka 16 tarik Risaw ha wah Umtru, hajan ka shnong Umtham, Ri-Bhoi District.
Haba pynbna ïa kane ka jingïalehkai ha Shillong Press Club ha ka sngi Palei, ki nongkitkam ka RBW&TCS ki la ïathuh ba kane ka jingïalehkai kadei kawei na kiba heh tam hapoh ka ri India ha kaba kin don haduh 80 ngut ki nongïalehkai kieng lieng na kylleng ki ri ka pyrthei kiban shim bynta ba kynthup ïa ki nongïalehkai ka ri India bad Nepal. La ïathuh ruh ba ka song pisa jong kane ka lympung ïalehkai long 15 lak tyngka. Ka thong ban pynlong ïa kane ka jingïalehkai ka long ban kyntiew ïa ki kam jngohkai bad ban pynlong ïa ka jylla Meghalaya kaba kiew ha kane ka jait jingïalehkai ym tang hapoh ka ri India hynrei ha ka pyrthei hi baroh kawei.
Shuh shuh ki la ïathuh ruh ba ki nongïalehkai kiba wan ban ïashim bynta ki lah ruh ban ïoh ka kabu ban pynmyllen ha ki wah la ka long shwa ban sdang ka jingïalehkai bad hadien ba la kut ka jingïalehkai ruh kumjuh. Ha kane ka jingïalehkai la ai mynsiem ruh na bynta ki kynthei ba kin wan ban ïashim bynta bad kan khot ruh ïa kumba hynriew ngut ki thei kieng lieng pawnam jong ka pyrthei ba kin ai ka jinghikai na bynta ki kynthei hapoh ka jylla.
Ka RBW&TCS ka la ai khublei ruh ïa ka tnad Tourism ka jylla kaba la kyrshan pisa ban pynlong ïa kane ka jingïalehkai.
