Shillong, Jylliew 26 : Ka Meghalaya Football Association (MFA) ka la pynbna ban pynlong biang ïa ka Meghalaya State League (MSL) ïa kaba ïa katei ka sien kaba lai yn pynlong ha u Risaw 2022, kaban wanrah biang sa shisien pat ha kajuh ka lympung ïa ki club kiba don ha kylleng ka jylla. La ïathuh ruh ba ki Associatioin kiba la pynïasoh sha ka MFA kin pyndep ïa ki league ïalehkai hapoh ka 30 tarik Nailur 2022.
Haba pynbna ïa kane ha Shillong Press Club ha ka sngi Saitjaiñ jong ka taïew ba lah dep, ka MFA ka la pynbna ruh ban sdang thymmai ïa ka Youth Leagues na bynta ki U-13, U-15, bad U-17 youth clubs (tang na bynta ki shynrang), ha kaba ki nongjop kin ïoh ban mihkhmat ïa ka jylla sha ka tournament ban sa pynlong da ka All India Football Federation.
U Bah Wanshan Kharkrang uba dei u deirector jong ka MSL u la ïathuh ba ka jingpynlong ïa katei ka lympung kadei lyngba ka jingkyrshan lang da ka sorkar jylla naduh kaba sdang haduh kane ka kynti ba mynta ruh, ha kaba ki club kiba jop ha ki league bapher bapher ba pynïaid da ki association kim pat ju ïoh kum kane ka lad tad haduh ba ka MFA kan shim ïa kane ka sienjam ha u 2017-18
U la ïathuh ba ïa kane ka lympung ha ki snem ba lah dep la pynlong ha Garo Hills, Ri-Bhoi, Jaintia Hills bad South West Khasi Hills. Bad ban ïaid shakhmat na bynta katei ka lympung, ka MFA mynta ka kynti kan pynlong da ka jingthep kyrteng bad kan sa jied ïa ki jaka katkum ka jinglah jong ki ban pyndap katkum jingpynbeit ba la buh da ka MFA.
La pynlong ïa ka MSL na bynta ka ïoh ka kot jong ki club ha kaba kin ïoh ban lum pisa na ki madan ïalehkai lyngba ki ticket bad na ka khusnam song pisa.
Hadien ka jingpynthut jong ka khlam jingpang Covid-19, ka Meghalaya Football Association ka dap da ka jingsngewkmen ha kaba ki nongkyrshan, ki club bad ki player kin mih ïakhun ha ka MSL. Ki association kiba la pynïasoh sha ka MFA ki dang ïaid shaphrang ha kaban pynkhreh ban pynlong ïa ki league ïalehkai bad ka MFA kan sa lah ban ai ki kyrteng jong ki club kiban ïashim bynta ha ka MSL hadien ba la kut baroh ki league.
