Ha u Nohprah yn rah ka Sorkar NDA ha Parliament ban pynbeit thymmai ïa ka Sixth Schedule
Markhmat ïakynduh u CEM ka KHADC ïa u Adviser ka MHA
Shillong, Nailur 22 : Ka Sorkar India ka lah ban rah ha u Nohprah ha Parliament ban pynbeit thymmai ïa ka Khyrnit kaba Hynriew (Sixth Schedule), kaba dei ka mat kaba baroh ki District Council ha ka thaiñ shatei lam-mihngi jong ka Ri ki ïakhun tyngeh.
Ïa kane la ïathuh da u CEM ka KHADC Bah Pynïaid Sing Syiem ba dei ruh u Chief Convener jong ki Autonomous District Council ha ka thaiñ shatei lammihngi ka Ri, hadien ka jingïakynduh ïa u Adviser jong ka Ministry of Home Affairs (Northeast), u AK Mishra hynin ka sngi ha Nongbah Delhi.
Katkum ka kyrwoh na u CEM ka KHADC, la ong ba ha ka jingïa kynduh ki la ïoh ban ïathir ïatai haba ïadei bad ka jingdawa bad ka jingkwah jong ki ADC kumba ki la dep ban pynpaw ha ka dorkhas ba ki phah ha ka 25tarik u Naitung ha Delhi ha u Myntri ka tnad Kampohing ka Ri, u Amit Shah.
“Ngi la ïoh ban ïatai bha bad u Adviser ka MHA bad u la sngewthuh ïa ka jingthmu jongngi halor kane ka jingpynkylla thymmai ïa ka Khyrnit kaba Hynriew. Hadien ka jingïakynduh ngi sngewthuh ruh ba ha u Nohprah ka Sorkar India kan wanrah ïa ka 125th Constitutional Amendment kaba kynthup ïa ka Khyrnit kaba Hynriew ha Parliament. Kumta nga ka liang jongngi ngi ai khublei kyrpang ïa ka Ministry kaba la sngap ïa ka jingai jingmut jong ki 10 tylli ki District Council,” u la ong.
Related Posts
La ïathuh ba ha kane ka taiew u AK Mishra u la ïa kynduh la ka jong ka jong ïa ki ADC ba dei na ka thaiñ shatei lam-mihngi ka Ri kynthup naduh Tripura, Bodo bad kumjuh na Meghalaya.
“Ngi la kren shai ba ngin ym ïa peiñ bad ka nongrim kaba ngi la tyrwa, kata ba ïa ka jinglong kyrpang jongngi kaba ngi don naduh hyndai hynthai kin ïai neh la ka long ha ka synshar khadar,” u la ong.
Shuh shuh u pynpaw ruh ba ki kwah ba kane ka jingpynbeit thymmai ïa ka Khyrnit kaba Hynriew kan ym pynkjap noh ïa ka jinglong ba kyrpang ba ka Jaidbynriew ka don.
“Ka khubor kaba ngi ïoh ka long ba ka Sorkar India hi kan ialeh katba lah ba na kane kan sa wanrah ïa ka jinglong kyrpang ha kiba bun ki kolshor jong ki riewlum ha ka thaiñ khamtam eh kiba don ia ka Khyrnit kaba Hynriew,” bynrap biang u CEM ka KHADC.
Ha kane ka jingleit la synran lang ïa u CEM da u EM ka Council Bah Fantin J Lakadong kumjuh ruh u Chairman ka KHADC Bah Lamphrang Blah.