Ha u Nohprah yn pyndep noh ïa ka Package -1 jong ka surok Shillong Dawki, pyntikna u Bah Prestone

Shillong, Nailur 24 : U Symbud Myntri Rangbah ka Jylla ba peit ïa ka tnad PWD, Bah Prestone Tynsong ha ka sngi Balang u la ïathuh ba ka jingpyntrei ïa ka surok Shillong Dawki mynta ka la ïaid shaid shaid bha kynthup naduh ka Package I, II, IV bad ka Package V.
Haba kren bad ki lad pathai khubor hadien ka jingïalang bad ki ophisar ka tnad, u Symbud Myntri Rangbah u la ïathuh ruh ba u la dep ban bthah ïa ka kompeni ba pyntrei ïa ka surok fourlane ba ka dei ba kadei ban pyndep noh ïa kane ka surok kaba hap ha ka package-1 ha u Nohprah mynta u snem.
Shuh shuh u la ïathuh ruh ba na ka bynta ki surok kiba hap ha ka Package II, IV, bad package V pat ki buh thong ba la kumno kumno yn pyndep noh ha shwa u Nohprah 2026.
“Na ka liang ki heh ka kompeni ki la kular ïangi ba kin sa pyndep noh ïa ka surok fourlane hapoh u Nohprah mynta u snem,” ong u Bah Prestone haba kren bad ki lad pathai khubor.
“Nga sngew tikna ba ïa ka Package – II yn sa lah ban pyndep ha ka por ba la buh ïa kaba ki buh ha u Nohprah 2026. Kane kan long kumjuh ïa ka Package IV bad Package V, ïa kaba nga sngew tikna ba ngin lah ban pyndep ïa ka kam ha ka por ba la buh da ka NHIDCL bad ka kompeni kaba pyntrei ïa ka kam,” u la bynrap biang.
U Bah Prestone u la pyntip ruh ba ïa ka Pynursla Bypass ki dang ap shwa ïa notification jong ka 3G ban ïoh pynbeit na ka bynta ka bai luksan shim jaka.
Halor kane ruh u ong ba mar ïa dep ban aiti ïa ka jaka sha ka NHIDCL, ka jingtrei kan sa sdang noh.