Ha u Nohprah yn plie noh ïa ka hospital ba 10 jingthiah ha Lumparing, jurip u Bah Sanbor ïa ki projek ba palat 11 klur

Shillong, Nailar 09 : Ka shnong Lumparing bad ki jaka ba marjan naduh u Nohprah kin sa ïoh noh la ka jong ka hospital kaban pynsuk ïa ki ha ka pang ka shitom lane ha kino kino ki jingjia ba donkam kyrkieh khamtam eh ha ka pun ka kha jong ki longkmie.
Haba pyntip ïa kane hadien ka jingjurip ïa ka jingïaid ka kam ha katei ka jaka sumar, u MLA ka thain Bah Sanbor Shullai u la ïathuh ba ki kyrmen skhem ba ha u Nohprah yn sa lah ban pyndep lut pura ïa kane ka jaka hospital kaba la buh thong ban plie noh ha utei u bnai.
Ha kane ka jingjurip la donlang ruh naduh ki ophisar na ka tnad ka Koit ka Khiah bad ruh na ka tnad PWD, nangta u Rangbah Shnong, Secretary Shnong, ki Seng Kynthei bad kiwei kiwei ki nongïalam shnong.
Katkum ka jingïathuh u Bah Sanbor ka jingpynlut ban tei ïa katei ka jaka sumar kaba 10 jingthiah ka long 4.13 klur tyngka, kynthup ban shna ïa ka surok ban poi sha katei ka jaka sumar.
Hadien kane, u MLA bad ki ophisar ryngkat ki nongïalam shnong ki la leit ruh ban jurip ïa ki surok kiban poi sha Lum Jingthang jong ka Seng Khasi bad ruh sha u Lum Jingtep Muslim nalor ki jingshna ïa ki jingtap jong ki nala ïaid um bad kiwei kiwei ki surok ha katei ka thaiñ.
“Baroh lada khein lang ïa kine ki projek baroh ba ngi jurip mynta ka sngi ka la kot palat ïa ka 11 klur tyngka,” ong u Bah Sanbor.
U ne u MLA u la ong ruh ba ka jingïaid stet ka kam kadei eh namar ka jingïatrei lang ryngkat ryngkat naduh ki nongïalam shnong haduh ki ophisar. Ha kajuh ka por u la ai ruh ka jingïaroh ïa ka jingshimkhia jong ki ban peit ba ka jingtrei ïa kitei ki projek kin long kiba ïaid stet bad janai ka rukom trei.
Haba bynrap lang, u Rangbah Shnong ka thain u la ong ba ka jingïoh ïa u MLA ba trei bad u bym shongthait ka dei ka jingkyrkhu kaba khraw ïa ka shnong baroh kawei namar ki kam pynroi ruh ki tuid da ki klur ki klur.
Da kaba kdew ba katei ka thain ka la ïoh lypa bun bha ki kam pynroi la ka long naduh ka Indoor Stadium, mynta sa ka jaka sumar bad ki lynti synkien, ki nongïalam shnong ki ong ba kane baroh ka urlong haba don u MLA u bym ju thait ban treikam.